Қашқадарё вилоятининг Нишон тумани ҳокими топшириғига кўра, ногиронларга мўлжалланган уйни таъмирлаган қурувчи 162 миллион сўм пулини ололмаётганини айтмоқда. Бу ҳақда «Дарё»га шикоят қилган тадбиркор Муҳаммад Ражабовнинг айтишича, ҳоким талаб қилган иш битганига икки йилдан ошган бўлса-да, ҳокимлик ҳалигача ваъдасини бажармаган.
«Нишон туманининг олдинги ҳокими Асрор Жўраев ва туман Халқ қабулхонаси раҳбари, айни кунда вилоят Халқ қабулхонаси бошлиғи бўлиб ишлаб келаётган Фахриддин Жумаевларнинг топшириғига кўра, тумандаги икки қаватли 12 хонадонли уйни 306 миллион сўм эвазига қайта таъмирлаб бергандим. Ўша пайтда пулнинг ярмини беришганди. Аммо ваъда қилинган пулнинг 162 миллион сўми ҳалигача тўлаб берилмаяпти», — дейди «Наво тонг ёғдуси» МЧЖ қурилиш ташкилоти раҳбари Муҳаммад Ражабов.
Қурувчи тадбиркорнинг маълумот беришича, 2017 йил Нишон тумани ҳокими Асрор Жўраев туманда ногиронлиги бўлган фуқароларни уй билан таъминлаши лозимлигини айтиб, тадбиркордан ёрдам беришини сўраган. Ҳоким топшириғига кўра, иш бошлаган қурувчи уй таъмирини қисқа муддатда якунлаган. 2017 йил декабрь ойида эса уй ўз эгаларига тантанали равишда топширилган.
«Қурилиш якунлангач, ҳоким ва прокурор тез орада пулимни ўтказиб беришларини айтди. Аммо кутилмаганда ҳоким ҳам прокурор ҳам ишдан кетди. Туман Халқ қабулхонаси бошлиғи эса вилоятга ишга ўтиб кетди. Ҳозирги ҳоким эса сенга берадиган пулим йўқ, мен сен билан келишмаганман деяпти, дейди қурувчи ташкилот раҳбари.
Мазкур масала юзасидан «Дарё» мухбири билан суҳбатлашган Нишон тумани ҳокими Мухтор Ҳайитмуродов муаммо тез орада ечилишини, бунинг учун эса тадбиркор қанча маблағ сарфлаб нима ишлар қилганини исботловчи ҳужжатлар тақдим қилиши лозимлигини айтди.
«Барча ҳужжатларимни такроран кўрсатдим, ҳокимият топшириғи билан қурилиш ишларини яна бир бор кўздан кечирган мутахассислар мен айтган маблағимдан кўпроқ пул сарфланганини маълум қилишди», — дейди Муҳаммад Ражабов.
Қурилиш ташкилоти раҳбарининг шикоят қилишича, мазкур уй таъмирлаши унинг дастлабки иши бўлган.
«Қурилиш ташкилотини тузиб, энди иш бошлаган пайтим шунақа ҳолатга тўғри келди. Ўша пайтда айтилган ишни бажариш учун иккита машинамни сотгандим. Аммо бугунги кунга келиб, ҳатто харажатимни ҳам қоплаб беришмаяпти», — дейди қурилиш ташкилоти раҳбари.
Қурилиш ташкилоти раҳбарининг айтишича, туман ҳокимлари ногиронлиги бор фуқаролар учун мўлжалланган уйни, одатда, тадбиркорлар ҳисобидан таъмирлайди ёки қуради.
«Кўпчилик қурилиш ташкилоти раҳбарлари бу ишни олиб бекор қилдинг, деб айтишганди. Кейин билсам, ҳокимлар бундай ишларни тадбиркорлар ҳисобидан битказишар экан ва умуман пул беришмас экан», — дейди Муҳаммад Ражабов.
Мухтор Ҳайитмуродовнинг қурилиш масалалари бўйича ўринбосарининг маълумот беришича, қурувчи тадбиркорнинг ҳокимлик билан тузган шартномаси йўқ. Шу сабабдан ҳам унинг пули тўлаб берилмаган.
«Қурувчи ишни бошлашдан олдин ҳокимият билан шартнома тузмаган, ҳокимнинг оғзаки топшириғи билан иш бажариб кетаверган. Бугунги кунга келиб эса қийин аҳволда қолган», — дейди ҳоким ўринбосари.
Ҳоким ўринбосарининг айтишича, қурувчи тадбиркорга харажатини қоплаб олиши учун бир нечта қурилиш объектлари берилган.
«‘Дом’ учун ҳожатхона қуриб беринг, дейишди. Қуриб бердим ва белгиланган пулимни олдим. Яна бир иншоотнинг томини ёпиб бердим. Аммо 162 миллион сўм пулим ҳалигача берилмади-да. Шу объектлардан қоплаб оласиз, дейишган. Қандай қилиб 162 миллион сўмни булардан чиқариб оламан, шуни тушунмаяпман», — дейди қурувчи.
Аниқланишича, туманнинг собиқ ҳокими Асрор Жўраев қурувчи уй таъмирини тугатгач, уни уйни ўз назоратига олган хусусий уй-жой мулкдорлари ширкати билан шартнома имзолатган. Ширкат эса айни кунда пулни тўлаб беролмайди — тайинли маблағи йўқ.
Қурувчи тадбиркор эса пулини олиш умидида ҳокимиятга қатнаш билан овора, аммо натижа йўқ.
Изоҳ (0)