Osiyo davlatlarida yangi turdagi koronavirus oqibatida yuzaga kelayotgan o‘lim holatlari kam kuzatilmoqda. Bunga aholining genetik o‘ziga xosligi va immuniteti sabab bo‘lishi mumkin. Bu haqda yaponiyalik epidemiolog, Kobe universiteti professori, yapon hukumatining sobiq ilmiy maslahatchisi Kentaro Ivataga tayanib, “RBK” xabar berdi.
Yaponiya va Janubi-Sharqiy Osiyoning boshqa davlatlarida COVID-19 koronavirus infeksiyasi oqibatida yuzaga kelayotgan o‘lim darajasi boshqa mamlakatlar, xususan, Yevropa davlatlariga qaraganda ancha past.
“Yaponiyada virus oqibatida jami 800 kishi vafot etdi, bu esa o‘lim ko‘rsatkichi boshqa davlatlarga nisbatan pastroq ekanligini ko‘rsatadi. Masаlan, Belgiyada 1 million aholiga 700 dan ortiq qurbon to‘g‘ri kelmoqda”, — deydi Ivata.
Yaponiya koronavirusni yengmagan va yakuniy xulosalarni berishga hali erta bo‘lsa-da, nima sababdan mamlakatda o‘lim holatlari boshqa davlatlarga nisbatan kam ekanligining bir necha farazlari mavjud. Birinchidan, osiyoliklar virusni yengishni osonlashtiruvchi o‘ziga xos genetik xususiyatga ega bo‘lishi mumkin. Ikkinchidan, Osiyo davlatlari aholisi boshqa viruslar bilan og‘rib yoki silga qarshi vaksinalar sabab immunitet hosil qilgan bo‘lishi mumkin, ammo ayrim tadqiqotlar vaksina borasidagi farazlarni yo‘qqa chiqargan.
Yana bir farazga ko‘ra, Osiyo davlatlari aholisi semirishga, tromblar yoki gipertoniya paydo bo‘lishiga moyil emas, bu esa virusga nisbatan zaiflikni kamaytiradi. “Umuman olganda bu faqat gipoteza bo‘lib, ilmiy tomondan tasdiqlanmagan”, — deydi Ivata.
Yaponiya hukumati pandemiya sabab aprel oyida mamlakatda favqulodda holat e’lon qilgandi, maktab va oliy o‘quv muassasalari yopilgan. Shu bilan birga, Yaponiya Shvetsiya, Janubiy Koreya va Belarus kabi qattiq karantin choralarini qo‘llamagan.
“Biz karantin choralariga rioya qilmaganlarni jazolamaymiz, politsiyachilar ko‘chalarni nazorat qilmayapti va hech kim hibsga olinayotgani yo‘q. Markaziy hukumat faollikni kamaytirish, sayrlar, yig‘ilishlar, ommaviy tadbirlar, sayohatlari kamaytirishni so‘radi va odamlar ushbu maslahatlarga amal qilmoqda, ularni hech kim majburlagani yo‘q”, — deydi Kentaro Ivata.
25-may kuni Yaponiya bosh vaziri Sindzo Abe mamlakatning barcha prefekturalarida favqulodda holat rejimi bekor qilinganini e’lon qildi. Abening so‘zlariga ko‘ra, Yaponiya qattiq cheklovlar joriy etmay, virusga qarshi tura olish qobiliyatini butun dunyoga ko‘rsatib qo‘ygan.
Izoh (0)