Shveysariyadagi ish beruvchi korxonalarga masofadan turib ishlayotgan xodimlarining turar joyi ijara haqining bir qismini qoplash majburiyati yuklatildi, deb yozmoqda Swissinfo.ch.
Lozannadagi federal sud agar xodim uydan ishlash rejimiga o‘tkazilgan bo‘lsa, ish beruvchilar xodimning turar joyi ijara haqining bir qismini qoplab berishi shartligi to‘g‘risida qaror chiqardi. Bunday qarorga birinchilardan bo‘lib Tages-Anzeiger va Sonntagszeitung gazetalari e’tibor qaratgan.
Ma’lum bo‘lishicha, ish beruvchining qarori bilan masofadan ishlashga o‘tkazilgan buxgalteriya kompaniyasining xodimlaridan biri o‘zining ikki xonali kvartirasi oshxonasini ish kabinetiga aylantirishga majbur bo‘lgan. U sudga da’vo arizasi bilan murojaat qilgan. Sud uning da’vosini qanoatlantirgan.
Ish beruvchi sudda ularning xodim bilan kelishuviga ko‘ra hech qanday moddiy kompensatsiya nazarda tutilmaganini ta’kidlagan. Biroq sud ish beruvchining e’tirozini rad etib, xodim kompensatsiyani o‘tgan sana bilan rasmiylashtirishi mumkinligini ta’kidlagan. Bunda u o‘z oshxonasida ishlaganmi yoki ish joyini tashkil qilish uchun qo‘shimcha joyni ijaraga olishga majbur bo‘lganmi, muhim emas.
Sud har oylik kompensatsiya miqdorini 150 Shveysariya franki (154 AQSh dollari)ga teng deb topishni adolatli deb baholagan.
Sankt-Gallen universitetining Mehnat huquqi kafedrasi professori Tomas Gayzerning ta’kidlashicha, sud qarori ajablanarli emas, chunki qonunchilikda ish beruvchilarga xodimlar o‘z ish vazifalarini bajarishi uchun lozim bo‘lgan barcha xarajatlarni qoplash majburiyati ko‘zda tutilgan. Shuningdek, uning ta’kidlashicha, bunday qaror faqat ish beruvchining buyrug‘i bilan uyda ishlayotgan xodimlarga nisbatan tatbiq etiladi. O‘z xohishi bilan uydan ishlashga o‘tgan xodimlar bunday kompensatsiyaga da’vogarlik qila olmaydi.
Lozanna federal sudining qarori koronavirus pandemiyasi tufayli uydan ishlash holatlari sonining keskin oshishi sharoitida qabul qilingan.
Shveysariya kasaba uyushmalari konfederatsiyasi bosh kotibi Luka Chirilyanoning aytishicha, kompaniyalar ko‘pincha ish joylari ijarasi uchun mablag‘ni tejash uchun ish joylarini qisqartirish siyosatidan foydalanadi va bu bilan barcha xarajatlarni xodimning zimmasiga yuklaydi, bu esa adolatdan emas.
Izoh (0)