BAAning Abu-Dabi amirligi rasmiylari aholi uchun asosiy shaharlar oralig‘ida harakatlanishiga bir haftalik taqiq joriy etdi. Bu haqda 31-may kuni Al Arabiya telekanali ma’lum qildi.
Unda aytilishicha, seshanbadan boshlab aholiga amirlikning yirik shaharlari Abu-Dabi, Al-Ayn va Az-Zafra oralig‘ida harakatlanish taqiqlanadi. Bundan tashqari, ko‘rsatib o‘tilgan davrda amirlik poytaxti Ab-Dabidan chiqishga ham ruxsat etilmaydi.
Bunday qaror Abu-Dabi bilan chegaradosh amirliklarda koronavirus bilan bog‘liq cheklovlarning jiddiy qisqartirilishi sharoitida qabul qilinmoqda. Xususan, Dubay amirligi hukumati 31-maydan boshlab davlat idoralari xodimlarining yarmiga ish joylariga qaytishga ruxsat berishga qaror qildi, 14-iyundan boshlab davlat xizmatlarining barcha xodimlari o‘z ish joylariga qaytishi mumkin.
May oyining o‘rtalaridan boshlab Dubayda mehmonxonalar qoshidagi plyajlar ochilgan, aholiga kichik guruh bo‘lib shaharda sayr qilish va sport bilan shug‘ullanishga ruxsat berildi. 27-maydan Dubayda kinoteatrlar va sport markazlari ishi tiklangan, shuningdek, ehtiyot choralari ko‘rilgan holda boshqa biznes turlariga ham soat 6:00 dan 23:00 gacha faoliyat ko‘rsatishga ruxsat berilgan.
BAA Sog‘liqni saqlash va profilaktika qilish vazirligining so‘nggi ma’lumotlariga ko‘ra, mamlakatda koronavirus yuqtirganlik bilan bog‘liq 31 mingdan ortiq holat qayd etilgan, bemorlarning 18 mingdan ortig‘i tuzalgan, 264 nafari vafot etgan.
Izoh (0)