Осиё давлатларида янги турдаги коронавирус оқибатида юзага келаётган ўлим ҳолатлари кам кузатилмоқда. Бунга аҳолининг генетик ўзига хослиги ва иммунитети сабаб бўлиши мумкин. Бу ҳақда япониялик эпидемиолог, Кобе университети профессори, япон ҳукуматининг собиқ илмий маслаҳатчиси Кэнтаро Иватага таяниб, «РБК» хабар берди.
Япония ва Жануби-Шарқий Осиёнинг бошқа давлатларида COVID-19 коронавирус инфекцияси оқибатида юзага келаётган ўлим даражаси бошқа мамлакатлар, хусусан, Европа давлатларига қараганда анча паст.
«Японияда вирус оқибатида жами 800 киши вафот этди, бу эса ўлим кўрсаткичи бошқа давлатларга нисбатан пастроқ эканлигини кўрсатади. Масалан, Бельгияда 1 миллион аҳолига 700 дан ортиқ қурбон тўғри келмоқда», — дейди Ивата.
Япония коронавирусни енгмаган ва якуний хулосаларни беришга ҳали эрта бўлса-да, нима сабабдан мамлакатда ўлим ҳолатлари бошқа давлатларга нисбатан кам эканлигининг бир неча фаразлари мавжуд. Биринчидан, осиёликлар вирусни енгишни осонлаштирувчи ўзига хос генетик хусусиятга эга бўлиши мумкин. Иккинчидан, Осиё давлатлари аҳолиси бошқа вируслар билан оғриб ёки силга қарши вакциналар сабаб иммунитет ҳосил қилган бўлиши мумкин, аммо айрим тадқиқотлар вакцина борасидаги фаразларни йўққа чиқарган.
Яна бир фаразга кўра, Осиё давлатлари аҳолиси семиришга, тромблар ёки гипертония пайдо бўлишига мойил эмас, бу эса вирусга нисбатан заифликни камайтиради. «Умуман олганда бу фақат гипотеза бўлиб, илмий томондан тасдиқланмаган», — дейди Ивата.
Япония ҳукумати пандемия сабаб апрель ойида мамлакатда фавқулодда ҳолат эълон қилганди, мактаб ва олий ўқув муассасалари ёпилган. Шу билан бирга, Япония Швеция, Жанубий Корея ва Беларусь каби қаттиқ карантин чораларини қўлламаган.
«Биз карантин чораларига риоя қилмаганларни жазоламаймиз, полициячилар кўчаларни назорат қилмаяпти ва ҳеч ким ҳибсга олинаётгани йўқ. Марказий ҳукумат фаолликни камайтириш, сайрлар, йиғилишлар, оммавий тадбирлар, саёҳатлари камайтиришни сўради ва одамлар ушбу маслаҳатларга амал қилмоқда, уларни ҳеч ким мажбурлагани йўқ», — дейди Кэнтаро Ивата.
25 май куни Япония бош вазири Синдзо Абэ мамлакатнинг барча префектураларида фавқулодда ҳолат режими бекор қилинганини эълон қилди. Абэнинг сўзларига кўра, Япония қаттиқ чекловлар жорий этмай, вирусга қарши тура олиш қобилиятини бутун дунёга кўрсатиб қўйган.
Изоҳ (0)