Farg‘ona viloyatida Qirg‘izistondan olib kelingan va Qo‘qondagi narkokuryerlar orqali sotilishi rejalashtirilgan katta miqdordagi giyohvandlik moddalarining savdosiga chek qo‘yildi. Bu haqda Davlat xavfsizlik xizmati xabar qilgan.
DXX Farg‘ona viloyati boshqarmasi xodimlari tomonidan o‘tkazilgan tezkor tadbir davomida Andijon—Qo‘qon yo‘nalishida harakatlanayotgan Nexia-2 rusumli avtomashina Qo‘qon shahriga kirishda to‘xtatildi.
Avtomashina ko‘zdan kechirilganda uning salonida Andijon tumanida yashovchi, 1978-yilda tug‘ilgan H.X. yo‘lovchi sifatida ketayotganligi, avtomobil yukxonasida esa unga tegishli sellofan paketda 5 kilogramm gashish giyohvand moddasi borligi ma’lum bo‘ldi.
Aniqlanishicha, gashish qirg‘izistonlik shaxslar tomonidan aylanma yo‘llar orqali Andijon viloyati Xo‘jaobod tumaniga olib o‘tilgan va H.X.ga berilgan. H.X. esa giyohvandlik vositasining 4 kilogrammini Qo‘qon shahrida yashovchi, 1978-yilda tug‘ilgan T.M.ga, qolgan 1 kilogrammini esa Farg‘ona tumanida yashovchi, 1984-yilda tug‘ilgan A.K.ga yetkazib berishi kerakligi ma’lum bo‘ldi, Tezkor tadbir davom ettirilib, Qo‘qon shahrida o‘tkazilgan tadbirlar jarayonida ikkala xaridor ham giyohvand moddalarni olayotgan vaqtida ushlandi.
Surishtiruv jarayonida T.M. muqaddam giyohvand moddalar savdosi bilan bog‘liq jinoyat sodir etganligi uchun 2007-yilda jinoyat ishlari bo‘yicha Farg‘ona shahar sudi tomonidan Jinoyat kodeksining 273-moddasi bilan ayblanib, 10 yil muddatga ozodlikdan mahrum qilingan. A.K. 2015-yilda Jinoyat kodeksining 246 va 273-moddalari bilan ayblanib, 7 yil muddatga ozodlikdan mahrum qilingan, 2020-yildan esa axloq tuzatish ishlari jazosini o‘tayotgani oydinlashdi.
Avval chegarada Qirg‘iziston tomonidan O‘zbekistonga giyohvand moddalar uloqtirish holatlari kuzatilayotgani xabar qilingandi.
Izoh (0)