Фарғона вилоятида Қирғизистондан олиб келинган ва Қўқондаги наркокурьерлар орқали сотилиши режалаштирилган катта миқдордаги гиёҳвандлик моддаларининг савдосига чек қўйилди. Бу ҳақда Давлат хавфсизлик хизмати хабар қилган.
ДХХ Фарғона вилояти бошқармаси ходимлари томонидан ўтказилган тезкор тадбир давомида Андижон—Қўқон йўналишида ҳаракатланаётган Nexia-2 русумли автомашина Қўқон шаҳрига киришда тўхтатилди.
Автомашина кўздан кечирилганда унинг салонида Андижон туманида яшовчи, 1978 йилда туғилган Ҳ.Х. йўловчи сифатида кетаётганлиги, автомобиль юкхонасида эса унга тегишли целлофан пакетда 5 килограмм гашиш гиёҳванд моддаси борлиги маълум бўлди.
Аниқланишича, гашиш қирғизистонлик шахслар томонидан айланма йўллар орқали Андижон вилояти Хўжаобод туманига олиб ўтилган ва Ҳ.Х.га берилган. Ҳ.Х. эса гиёҳвандлик воситасининг 4 килограммини Қўқон шаҳрида яшовчи, 1978 йилда туғилган Т.М.га, қолган 1 килограммини эса Фарғона туманида яшовчи, 1984 йилда туғилган А.К.га етказиб бериши кераклиги маълум бўлди, Тезкор тадбир давом эттирилиб, Қўқон шаҳрида ўтказилган тадбирлар жараёнида иккала харидор ҳам гиёҳванд моддаларни олаётган вақтида ушланди.
Суриштирув жараёнида Т.М. муқаддам гиёҳванд моддалар савдоси билан боғлиқ жиноят содир этганлиги учун 2007 йилда жиноят ишлари бўйича Фарғона шаҳар суди томонидан Жиноят кодексининг 273-моддаси билан айбланиб, 10 йил муддатга озодликдан маҳрум қилинган. А.К. 2015 йилда Жиноят кодексининг 246 ва 273-моддалари билан айбланиб, 7 йил муддатга озодликдан маҳрум қилинган, 2020 йилдан эса ахлоқ тузатиш ишлари жазосини ўтаётгани ойдинлашди.
Аввал чегарада Қирғизистон томонидан Ўзбекистонга гиёҳванд моддалар улоқтириш ҳолатлари кузатилаётгани хабар қилинганди.
Изоҳ (0)