Xalqaro tadqiqotchilar guruhi qondagi gemoglobin miqdorini bevosita aniqlash usulini ishlab chiqdi, deb xabar beradi “Korrespondent.net”.
Ishlanma mualliflarining fikricha, ular yaratgan usul tahlil o‘tkazish uchun zarur uskunalar mavjud bo‘lmagan qashshoq mamlakatlarda qo‘l keladi.
“Gemoglobin miqdorini aniqlash uchun smartfonga maxsus dasturni yuklab olib, ko‘rsatkich barmoq bilan pastga tortilgan pastki qovoqni suratga olish kifoya. Dastur tasvirni qabul qilib, uni kompyuterga jo‘natadi. Kompyuter esa gemoglobin miqdorini spektral tahlil yordamida aniqlaydi”, — deydi g‘oya mualliflari.
Qayd etilishicha, dastur keniyalik ko‘ngillilar ishtirokida sinab ko‘rilgan. Ularning gemoglobin miqdori odatiy laboratoriyada ham tekshirilgan.
“Yangi usul gemoglobin miqdorini aniqlashning an’anaviy usullaridan farq qilmasligi aniqlandi”, — deyiladi xabarda.
Ishlanma mualliflari ko‘plab kasalliklarning simptomi bo‘lishi mumkin bo‘lgan anemiyani o‘z vaqtida aniqlashga yordam berishga umid qilmoqda.
Izoh (0)