Farg‘ona viloyatida Ichki ishlar organlari, Davlat xavfsizlik xizmati, Milliy gvardiya va mahalla fuqarolar yig‘inlari bilan hamkorlikda “Qora dori — 2020” keng qamrovli tadbirining birinchi bosqichi o‘tkazilmoqda, deb xabar bermoqda viloyat IIB matbuot xizmati.
Qayd etilishicha, 2020-yilning 1—15-may kunlari giyohvandlik vositalarining noqonuniy muomalasi bilan bog‘liq jami 50 dan ortiq holat qayd etilgan. Ular jumlasiga giyohvandlik vositalarini qonunga xilof ravishda saqlash va o‘tkazish, kuchli ta’sir qiluvchi vositalarni qonunga xilof ravishda muomalaga kiritish hamda taqiqlangan ekinlarni ekish va yetishtirish kiradi.
Shu bilan birga, 30 dan ortiq holatda 20 ming tupdan ko‘p bo‘lgan ko‘knori va nasha giyohvandlik o‘simliklari qonunga xilof ravishda parvarishlanayotganligi aniqlanib, yo‘q qilish choralari ko‘rilgan. Tadbir davomida ko‘knori, marixuana va kuchli ta’sir qiluvchi jami 200 kilogrammdan ortiq giyohvandlik vositasi olingan.
Yuqoridagi aniqlangan holatlar bo‘yicha Jinoyat kodeksining tegishli moddalari bilan jinoyat ishlari qo‘zg‘atilib, aybdor shaxslarga nisbatan qonuniy choralar ko‘rilmoqda.
Izoh (0)