Rossiya prezidentining faoliyatini doimiy ravishda yorituvchi jurnalistlar guruhining a’zosi Dmitriy Smirnov o‘zining Telegram’dagi kanalida prezident matbuot kotibi Dmitriy Peskov koronavirusga chalingani haqidagi xabarlardan keyin uning aprel oyida virusga qarshi blokator taqqanini esladi.
“Dmitriy Peskov bir oy oldin virusga qarshi beyjik ko‘rinishidagi blokator taqqan holda gubernatorlar bilan telekonferensiyada”, — deyiladi jurnalistning postida.
OAV xodimlari Peskovning virusga qarshi blokator taqqanini 8-aprel kuni payqab qolgandi. Rossiya prezidenti matbuot kotibi qurilmani dorixonada sotib olganini aytgandi, biroq uning samarali ekanligiga ishonchi komil emasligini bildirgandi. O‘shanda jurnalistlar unga blokatorning salbiy ta’sirlari, xususan, hushdan ketish va nafas olishda ovoz xirillashi yuzaga kelishi mumkinligini aytgandi.
Ikki kundan keyin jurnalistlar Peskov blokatordan foydalanishni to‘xtatgani haqida yozgan va unda blokator yo‘qligini ko‘rsatuvchi suratni e’lon qilgan. Peskov blokatordan voz kechgani sababini tushuntirib, “Uning aniq zararli ekanligini aytib, hamma meni qo‘rqitdi”, degan.
Dmitriy Peskov 12-may kuni koronavirusga chalinganini ma’lum qildi. U rafiqasi Tatyana Navka bilan birga kasalxonaga yotqizilgan. So‘nggi marta Dmitriy Peskov 30-aprelda Vladimir Putin raisligi bo‘lib o‘tgan yig‘ilishda ommaga ko‘rinish bergan. Putinning o‘zi bilan esa u taxminan bir oy avval bevosita ko‘rishib, muloqot qilgan.
Dmitriy Peskov Rossiyada hukumatining koronavirusga chalingan beshinchi a’zosi bo‘ldi. O‘zining koronavirusga chalingani haqida birinchi bo‘lib 30-aprel kuni Rossiya bosh vaziri Mixail Mishustin ma’lum qilgandi. U kasalxonaga yotqizilgach, hukumat rahbari vakolatlari bosh vazirning birinchi o‘rinbosari Andrey Belousovga yuklatilgan. 1-may kuni esa Rossiya qurilish vaziri Vladimir Yakushev va uning o‘rinbosari Dmitriy Volkovning koronavirusga chalingani ma’lum bo‘lgandi. 6-may kuni esa Rossiya madaniyat vaziri Olga Lyubimovaning koronavirusga chalingani ma’lum qilindi.
Koronavirus pandemiyasi davrida virus blokatori taqish holati O‘zbekiston hukumati vakillari orasida ham kuzatildi. Hukumat a’zolarining ushbu qurilmalarni taqqani 8-aprel kuni Prezident Shavkat Mirziyoyev raisligida koronavirus pandemiyasiga qarshi kurash va mamlakatda tomorqa xo‘jaligini rivojlantirish bo‘yicha bo‘lib o‘tgan videoselektor yig‘ilishi lavhalarida ko‘ringan. O‘shanda bosh vazir Abdulla Aripov, ichki ishlar vaziri Po‘lat Bobojonov va bosh vazir o‘rinbosari — iqtisodiy taraqqiyot va kambag‘allikni qisqartirish vaziri Jamshid Qo‘chqorov virus blokatorlarini taqqandi.
Shundan so‘ng O‘zbekiston hukumatining boshqa a’zolari ham virus blokatori taqqan holatlar uchradi.
Izoh (0)