O‘zbekiston Senati 11-may, dushanba kuni bo‘lib o‘tgan to‘rtinchi yalpi majlisda “Toshkent shahri va Toshkent viloyatida doimiy propiska qilinishi lozim bo‘lgan shaxslar — O‘zbekiston Respublikasi fuqarolari toifalarining ro‘yxati to‘g‘risida”gi qonunga o‘zgartish va qo‘shimchalar kiritish to‘g‘risidagi qonunni ma’qulladi.
Kiritiladigan o‘zgarishlarga ko‘ra, “doimiy propiska” so‘zlari “yashash joyi bo‘yicha ro‘yxatga olish” so‘zlariga almashtirilmoqda.
Bundan tashqari, fuqarolarga nafaqat birinchi va ikkinchi darajadagi qarindoshlari yashab turgan manzilga, balki ularning egaligida bo‘lgan boshqa manzildagi uy-joy maydonida ham doimiy ro‘yxatda turish imkoniyati yaratiladi.
Er-xotinning nikohdan keyin bir yil davomida birgalikda yashash sharti va bir yil ichida nikoh bekor qilingan taqdirda propiskani yo‘qotish bo‘yicha qoidalar bekor qilinadi.
Oilaga tarbiyaga olingan (patronat) shaxslar ularning tutingan ota-onasining doimiy yashash joyi bo‘yicha ro‘yxatga olinadi. Amaldagi qonunchilikda esa bu ko‘zda tutilmagan.
Ilgari Toshkent shahri va Toshkent viloyatida doimiy yashash joyi bo‘yicha ro‘yxatga olingan fuqarolar doimiy yashash uchun tegishincha qaytib kelganida, ular Toshkent shahri va Toshkent viloyatiga hech qanday to‘siqlarsiz doimiy yashash joyi bo‘yicha qayta ro‘yxatga olinadi.
Tegishli lavozimlarga saylangan, tayinlangan, tasdiqlangan fuqarolarga hamda respublika ahamiyatiga molik boshqa davlat tashkilotlariga ishga taklif etilayotgan yuqori malakali mutaxassislar uchun lavozimni egallab turish davriga beriladigan doimiy yashash joyi bo‘yicha ro‘yxatga olinish huquqiga cheklov bekor qilinadi.
Shuningdek, respublikaning boshqa hududlarida doimiy yashash joyi bo‘yicha ro‘yxatga olingan fuqarolar Toshkent shahri va Toshkent viloyatidagi yangi qurilgan uylarni sotib olib, uch yil ichida sotgan holatlarda davlat bojining alohida stavkalarini qo‘llash tartibi bekor qilinadi.
Eslatib o‘tamiz, ushbu o‘zgarishlarni ko‘zda tutuvchi qonun loyihasini tuzish Shavkat Mirziyoyevning propiska tizimini isloh qilish to‘g‘risidagi 21-apreldagi farmonida belgilangan edi. Qonun kuchga kirishi uchun u Prezident tomonidan imzolanishi lozim.
Izoh (0)