Россия президентининг фаолиятини доимий равишда ёритувчи журналистлар гуруҳининг аъзоси Дмитрий Смирнов ўзининг Telegram’даги каналида президент матбуот котиби Дмитрий Песков коронавирусга чалингани ҳақидаги хабарлардан кейин унинг апрель ойида вирусга қарши блокатор таққанини эслади.
«Дмитрий Песков бир ой олдин вирусга қарши бейжик кўринишидаги блокатор таққан ҳолда губернаторлар билан телеконференцияда», — дейилади журналистнинг постида.
ОАВ ходимлари Песковнинг вирусга қарши блокатор таққанини 8 апрель куни пайқаб қолганди. Россия президенти матбуот котиби қурилмани дорихонада сотиб олганини айтганди, бироқ унинг самарали эканлигига ишончи комил эмаслигини билдирганди. Ўшанда журналистлар унга блокаторнинг салбий таъсирлари, хусусан, ҳушдан кетиш ва нафас олишда овоз хириллаши юзага келиши мумкинлигини айтганди.
Икки кундан кейин журналистлар Песков блокатордан фойдаланишни тўхтатгани ҳақида ёзган ва унда блокатор йўқлигини кўрсатувчи суратни эълон қилган. Песков блокатордан воз кечгани сабабини тушунтириб, «Унинг аниқ зарарли эканлигини айтиб, ҳамма мени қўрқитди», деган.
Дмитрий Песков 12 май куни коронавирусга чалинганини маълум қилди. У рафиқаси Татьяна Навка билан бирга касалхонага ётқизилган. Сўнгги марта Дмитрий Песков 30 апрелда Владимир Путин раислиги бўлиб ўтган йиғилишда оммага кўриниш берган. Путиннинг ўзи билан эса у тахминан бир ой аввал бевосита кўришиб, мулоқот қилган.
Дмитрий Песков Россияда ҳукуматининг коронавирусга чалинган бешинчи аъзоси бўлди. Ўзининг коронавирусга чалингани ҳақида биринчи бўлиб 30 апрель куни Россия бош вазири Михаил Мишустин маълум қилганди. У касалхонага ётқизилгач, ҳукумат раҳбари ваколатлари бош вазирнинг биринчи ўринбосари Андрей Белоусовга юклатилган. 1 май куни эса Россия қурилиш вазири Владимир Якушев ва унинг ўринбосари Дмитрий Волковнинг коронавирусга чалингани маълум бўлганди. 6 май куни эса Россия маданият вазири Ольга Любимованинг коронавирусга чалингани маълум қилинди.
Коронавирус пандемияси даврида вирус блокатори тақиш ҳолати Ўзбекистон ҳукумати вакиллари орасида ҳам кузатилди. Ҳукумат аъзоларининг ушбу қурилмаларни таққани 8 апрель куни Президент Шавкат Мирзиёев раислигида коронавирус пандемиясига қарши кураш ва мамлакатда томорқа хўжалигини ривожлантириш бўйича бўлиб ўтган видеоселектор йиғилиши лавҳаларида кўринган. Ўшанда бош вазир Абдулла Арипов, ички ишлар вазири Пўлат Бобожонов ва бош вазир ўринбосари — иқтисодий тараққиёт ва камбағалликни қисқартириш вазири Жамшид Қўчқоров вирус блокаторларини таққанди.
Шундан сўнг Ўзбекистон ҳукуматининг бошқа аъзолари ҳам вирус блокатори таққан ҳолатлар учради.
Изоҳ (0)