Andijon viloyatida 4 nafar, Namangan viloyatida 2 nafar hamda Surxondaryo viloyatida 2 nafar, jami 8 nafar bemor COVID-19 koronavirusi infeksiyasidan butunlay sog‘aydi va reabilitatsiyaga kuzatildi. Bu haqda Sog‘liqni saqlash vazirligi xabar qilgan.
Andijonda 2 nafar erkak va 2 nafar ayol kasallikdan tuzalgan, ular ushbu viloyatda istiqomat qiluvchi fuqarolar. Bemorlarning hammasi koronavirus infeksiyasiga chalinganlar bilan muloqot orqali kasallikni yuqtirib olgan. Ular orasida eng yoshi kattasi 66 da, eng kichigi 2018-yilda tug‘ilgan.
Andijon viloyatida shu paytga qadar 158 nafar bemor sog‘aygan bo‘lsa, endilikda ularning soni 162 nafarga yetdi. Umumiy kasallanganlar soni 169 nafarni tashkil qilgan va hozirda 7 nafar bemor davolanmoqda.
Surxondaryoda tuzalgan 64 yoshli erkak ushbu viloyatda yashaydi, u koronavirus infeksiyasiga chalinganlar bilan muloqot orqali kasallikni yuqtirib olgan. 43 yoshli boshqa bir bemor (erkak) esa Samarqand viloyatidan bo‘lib, uzoq masofaga qatnovchi avtomashina haydovchisi. U Rossiyadan Tojikiston orqali Surxondaryoga kirib kelgan va karantinga olingan, koronavirus infeksiyasi aniqlangach, shifoxonaga yotqizilgan.
Surxondaryo viloyatida sog‘ayganlar soni 38 nafarga yetdi. Viloyatda koronavirus infeksiyasining aniqlanishi bo‘yicha 44 ta holat kuzatilgan. Bugungi kunda ushbu hududda 6 nafar bemor davolanmoqda.
Namanganda sog‘aygan 54 yoshli erkak Namangan tumanidan, 72 yoshli erkak esa Namangan shahrida yashaydi. Ular ham koronavirus infeksiyasiga chalinganlar bilan muloqot orqali kasallikni yuqtirib olgan.
Namangan viloyatida kasallikdan tuzalganlarning umumiy soni 197 nafarni tashkil qilmoqda. Umumiy kasallanganlar soni esa 240 nafar, 39 nafar bemor davolanmoqda.
O‘zbekistonda 2020-yil 12-may soat 16:00 holatiga ko‘ra koronavirusga chalinganlar soni 2519 nafarni tashkil qilmoqda. 15-martdan buyon 1996 kishi kasallikdan sog‘aydi, 10 kishi esa infeksiya asoratlari oqibatida vafot etgan.
Izoh (0)