G‘uzor tumanidagi namunali uylarda aholi e’tiroziga sabab bo‘lgan kamchiliklarni bartaraf etish ishlari boshlandi. Elektr toki esa boshqa tarmoqdan ulab beriladigan bo‘ldi. Bu haqda “Daryo”ga tuman hokimligi axborot xizmati rahbari Xudoyberdi Yo‘ldoshev ma’lum qildi.
“Daryo”da e’lon qilingan maqolada tumanning “Amir Temur” mahallasida yashovchi aholi 2018-yil foydalanishga topshirilgan namunali uylar yaroqsizligi va elektr ta’minotidagi muammolardan shikoyat qilgandi.
“Ushbu holatga oydinlik kiritish va kamchiliklarni bartaraf qilish maqsadida tuman hokimligida tezkor ishchi guruh tashkil qilindi, — deyiladi tuman hokimligi munosabatida. — O‘rganish natijasida tumandagi ‘Amir Temur’ mahallasida bunyod etilgan namunali uy-joylar maqolada ko‘rsatilgan darajada achinarli holda emasligi aniqlandi”
Tuman hokimligi axborot xizmatining yozishicha, ayni kunda bosh pudratchi “Namuna Sabrina maxsus servis” xususiy korxonasi tomonidan uy-joylardagi mavjud kamchiliklarni bartaraf etish ishlari boshlangan.
“Daryo” muxbiri bilan suhbatlashgan aholi vakillaridan biri Lobar Tursunovaning aytishicha, haqiqatan ham quruvchilar ular yashayotgan uylarga borib, aholi uylaridagi kamchiliklarni bartaraf etishga kirishgan.
“Qozonxonadagi kamchiliklar tuzatildi. Suv quvuridagi nosozliklar bartaraf etildi. Faqat hovlidagi beton yomg‘irdan so‘ng qayta ta’mirlanadigan bo‘ldi”, — deydi Lobar Tursunova.
Qo‘shimcha qilinishicha, aholining elektr energiyasi bilan bog‘liq muammolarini bartaraf etish maqsadida mahallaning El haqi ko‘chasida yashovchi aholiga “G‘armiston” 110/10 podstansiyasi “Yangiyer” fideridan elektr toki yetkazib beriladi.
Izoh (0)