Андижон вилоятида 4 нафар, Наманган вилоятида 2 нафар ҳамда Сурхондарё вилоятида 2 нафар, жами 8 нафар бемор COVID-19 коронавируси инфекциясидан бутунлай соғайди ва реабилитацияга кузатилди. Бу ҳақда Соғлиқни сақлаш вазирлиги хабар қилган.
Андижонда 2 нафар эркак ва 2 нафар аёл касалликдан тузалган, улар ушбу вилоятда истиқомат қилувчи фуқаролар. Беморларнинг ҳаммаси коронавирус инфекциясига чалинганлар билан мулоқот орқали касалликни юқтириб олган. Улар орасида энг ёши каттаси 66 да, энг кичиги 2018 йилда туғилган.
Андижон вилоятида шу пайтга қадар 158 нафар бемор соғайган бўлса, эндиликда уларнинг сони 162 нафарга етди. Умумий касалланганлар сони 169 нафарни ташкил қилган ва ҳозирда 7 нафар бемор даволанмоқда.
Сурхондарёда тузалган 64 ёшли эркак ушбу вилоятда яшайди, у коронавирус инфекциясига чалинганлар билан мулоқот орқали касалликни юқтириб олган. 43 ёшли бошқа бир бемор (эркак) эса Самарқанд вилоятидан бўлиб, узоқ масофага қатновчи автомашина ҳайдовчиси. У Россиядан Тожикистон орқали Сурхондарёга кириб келган ва карантинга олинган, коронавирус инфекцияси аниқлангач, шифохонага ётқизилган.
Сурхондарё вилоятида соғайганлар сони 38 нафарга етди. Вилоятда коронавирус инфекциясининг аниқланиши бўйича 44 та ҳолат кузатилган. Бугунги кунда ушбу ҳудудда 6 нафар бемор даволанмоқда.
Наманганда соғайган 54 ёшли эркак Наманган туманидан, 72 ёшли эркак эса Наманган шаҳрида яшайди. Улар ҳам коронавирус инфекциясига чалинганлар билан мулоқот орқали касалликни юқтириб олган.
Наманган вилоятида касалликдан тузалганларнинг умумий сони 197 нафарни ташкил қилмоқда. Умумий касалланганлар сони эса 240 нафар, 39 нафар бемор даволанмоқда.
Ўзбекистонда 2020 йил 12 май соат 16:00 ҳолатига кўра коронавирусга чалинганлар сони 2519 нафарни ташкил қилмоқда. 15 мартдан буён 1996 киши касалликдан соғайди, 10 киши эса инфекция асоратлари оқибатида вафот этган.
Изоҳ (0)