Ijtimoiy tarmoqlarda Sardobadagi suv to‘g‘onining yorilishi natijasida jabrlangan Sirdaryo aholisiga yordam berish maqsadida o‘zi yig‘ib yurgan pullarni xayriya qilgan 3,5 yoshli bolakay to‘g‘risidagi ma’lumotlar tarqaldi. Toshkent shahar hokimligi bu bolakayning kimligini aniqlab, u haqida reportaj tayyorladi.
Toshkent shahrida istiqomat qiluvchi 3,5 yoshli Muhammad Alimov qatiq idishi ichiga yig‘ib kelgan pullarini xayriyaga topshirgan.
“Farzandimizning turli mayda va qaytim pullarni yig‘adigan xayriya qutisi bor edi. Shu kunlarda Sirdaryoda bo‘lgan voqealar, talafotlarga oilamiz nomidan ehson qilamiz deb turganimizda shu fikr tug‘ilib qoldi. Kichkina farzandimiz shu narsani ham [yig‘ilgan pullar — tahr.] beraylik deb aytib qoldi”, — deydi Muhammad Alimovning dadasi.
Ta’kidlanishicha, Muhammad oilaning beshinchi farzandi. Muxbirlar kichik qahramonni qanchalik suhbatga tortishga harakat qilmasin, bolakayning uyatchanligi sabab urinishlar zoye ketgan.
“Muhammad bilan yig‘ayotgan pulimiz bor edi. O‘shani bitta joyga olib borib topshirdik. Suv toshqini bo‘lganiga xayriya qildik”, — deydi Muhammadning akasi Abdulvosit.
Ta’kidlash kerakki, O‘zbekiston Prezidenti tashabbusi bilan tashkil etilgan “Saxovat va ko‘mak” umumxalq harakati doirasida Sardobadagi falokatdan jabr ko‘rganlarga yordam berish uchun “Saxovat karvon”lari jo‘natilmoqda. Xususan, Toshkent, Andijon, Samarqand, Farg‘ona, Qashqadaryo viloyatlaridan toshqindan jabrlangan sardobaliklar uchun insonparvarlik yordami yuborildi.
Mavzuga doir:
Izoh (0)