AQSh hukumati koronavirus pandemiyasi davom etishi ehtimoliga oldindan tayyorgarlik ko‘rib, jasadlar solinadigan 100 mingta qopga buyurtma berdi, deb yozmoqda Wall Street Journal.
Gazetaning ma’lum qilishicha, 5,1 million dollarlik buyurtmani 21-aprel kuni Favqulodda vaziyatlarni nazorat qilish federal agentligi (FEMA) rasmiylashtirgan. Buyurtma ma’lumotlarida yetkazib beruvchi Kaliforniyadagi kichik kompaniya ekanligi, u buyurtmani 4-may kuni yetkazib berishi kerakligi yozilgan.
FEMA vakilining aytishicha, agentlik AQShda pandemiyaning “salbiy ssenariy”si ehtimoliga avvaldan tayyorgarlik ko‘rmoqda. Ular eng og‘ir vaziyatda yuzaga keladigan talabdan kelib chiqib, zaxirani to‘ldirish maqsadida va kelajakda ularga ehtiyoj tug‘ilishini hisobga olib, jasad solinadigan qoplarga ko‘proq buyurtma bergan.
So‘nggi ma’lumotlarga ko‘ra, butun mamlakat bo‘ylab koronavirusga chalinganlar soni 1 million kishidan, qurbonlar soni 60 ming kishidan oshib ketgan. 120 mingdan ortiq bemor davolanishga muvaffaq bo‘lgan.
Avvalroq AQShda koronavirusni aniqlash bo‘yicha test o‘tkazishni ikki baravarga oshirish rejalashtirilayotgani haqida xabar berilgan edi. Mamlakat prezidenti Donald Tramp esa AQShda koronavirus bilan bog‘liq vaziyat yaxshilanayotganini ma’lum qilgan.
Izoh (0)