Liviya milliy armiyasi (LMA) musulmonlar uchun muqaddas Ramazon oyida harbiy harakatlarni to‘xtatib turishga qaror qildi. “RIA Novosti”ning xabar berishicha, bu haqda LMA rasmiy spikeri Ahmad al-Mismari ma’lum qilgan.
“Ushbu muborak voqea (Ramazon oyi kirib kelishi) munosabati bilan qardosh va do‘stona davlatlarning ushbu xayrli oyda harbiy harakatlarga barham berish to‘g‘risidagi chaqiriqlariga javoban qurolli kuchlarning bosh qo‘mondonligi barcha harbiy harakatlar to‘xtatib turilishini e’lon qiladi”, — degan al-Mismari Bing‘ozida o‘tkazilgan matbuot anjumanida.
LMA spikeri, shuningdek, terrorchilar tomonidan ushbu tartibning har qanday buzilishi keskin choralar ko‘rilishga sabab bo‘lishini qo‘shimcha qilgan.
Eslatib o‘tamiz, Liviyada urush 2011-yilda NATO operatsiyasi chog‘ida o‘ldirilgan Liviyaning sobiq yetakchisi Muammar Kaddafidan keyin boshlangan edi. O‘shandan beri mamlakat ikkiga bo‘lingan: BMT tomonidan qo‘llab-quvvatlanadigan milliy kelishuv hukumati hamda Liviya sharqidagi Tobruk shahrida joylashgan general Xaftar boshchiligidagi muxolifat hisoblanadi.
Mamlakatda nizoning yanada keskinlashuviga milliy kelishuv hukumatining Xalifa Xaftar boshchiligidagi Liviya milliy armiyasiga qarshi kurashda harbiy yordam uchun Turkiyaga murojaat qilish qarori sabab bo‘lgan edi.
Izoh (0)