АҚШ ҳукумати коронавирус пандемияси давом этиши эҳтимолига олдиндан тайёргарлик кўриб, жасадлар солинадиган 100 мингта қопга буюртма берди, деб ёзмоқда Wall Street Journal.
Газетанинг маълум қилишича, 5,1 миллион долларлик буюртмани 21 апрель куни Фавқулодда вазиятларни назорат қилиш федерал агентлиги (FЕМА) расмийлаштирган. Буюртма маълумотларида етказиб берувчи Калифорниядаги кичик компания эканлиги, у буюртмани 4 май куни етказиб бериши кераклиги ёзилган.
FЕМА вакилининг айтишича, агентлик АҚШда пандемиянинг «салбий сценарий»си эҳтимолига аввалдан тайёргарлик кўрмоқда. Улар энг оғир вазиятда юзага келадиган талабдан келиб чиқиб, захирани тўлдириш мақсадида ва келажакда уларга эҳтиёж туғилишини ҳисобга олиб, жасад солинадиган қопларга кўпроқ буюртма берган.
Сўнгги маълумотларга кўра, бутун мамлакат бўйлаб коронавирусга чалинганлар сони 1 миллион кишидан, қурбонлар сони 60 минг кишидан ошиб кетган. 120 мингдан ортиқ бемор даволанишга муваффақ бўлган.
Аввалроқ АҚШда коронавирусни аниқлаш бўйича тест ўтказишни икки бараварга ошириш режалаштирилаётгани ҳақида хабар берилган эди. Мамлакат президенти Дональд Трамп эса АҚШда коронавирус билан боғлиқ вазият яхшиланаётганини маълум қилган.
Изоҳ (0)