Коронавирус тарқалиши ўчоғи бўлган Хитойнинг Ухань шаҳри касалхоналарида COVID-19’га чалинган бирорта бемор қолмади. Бу ҳақда мамлакат Соғлиқни сақлаш миллий комиссияси расмий вакили Ми Фен маълум қилган.
«Ухандаги шифокорлар ва уларга ёрдам берган бутун мамалакат тиббиёт ходимларининг биргаликдаги саъй-ҳаракатлари натижасида 26 апрель ҳолатига кўра, Ухандаги касалхоналарда коронавирус инфекциясига чалинган бирорта бемор қолмади», — деган у брифингда.
Мамлакат Соғлиқни сақлаш миллий комиссиясининг 25 апрель куни эълон қилган статистикасида эпидемия бошланганидан буён Ухань шаҳри жойлашган Хубэй провинциясида коронавирусга чалиниш бўйича 68 128 та ҳолат қайд этилгани (шундан 50 333 таси Уханда), уларнинг 63 604 нафари тузалгани, 4 512 бемор вафот этгани маълум қилинган ва касалхонада 12 киши қолгани айтилган.
Аввалроқ Уханда коронавирусга чалинган беморларни даволашда ёрдам берган қурилмалар Тошкентга олиб келингани хабар берилган эди. Ўзбекистонда коронавирусга қарши курашда 15 нафар хитойлик шифокор ва 1 нафар кореялик мутахассис ҳам иштирок этмоқда. Бундан ташқари, Ўзбекистон Хитойдан уч марта гуманитар ёрдам юкларини қабул қилди ҳамда мазкур мамлакатдан 200 мингта тест тизимини сотиб олди.
Изоҳ (0)