Shavkat Mirziyoyev pandemiyaning to‘qimachilik sanoatiga ta’sirini yumshatish masalalari bo‘yicha yig‘ilish o‘tkazdi

Shavkat Mirziyoyev 23-aprel, payshanba kuni, to‘qimachilik sanoati barqarorligini ta’minlash, pandemiyaning sohaga ta’sirini yumshatish masalalari bo‘yicha yig‘ilish o‘tkazdi. Bu haqda Prezident matbuot xizmati xabar berdi.

Yig‘ilishda O‘zbekiston to‘qimachilik sanoatida 2 mingdan ziyod korxona faoliyat yuritayotgani, ularda 365 ming nafar aholi ishlashi, sohaning eksport salohiyati so‘nggi 3 yilda 2 baravar oshgani, 2019-yilda bu boradagi ko‘rsatkich 1,6 milliard dollarni tashkil etgani qayd etildi.

Shuningdek, sohada rezerv va imkoniyatlar yetarliligi, xususan, mamlakatda yetishtirilgan paxtani to‘liq qayta ishlab, eksportni 15 milliard dollarga yetkazish va 3 milliondan ortiq aholini ish bilan ta’minlash imkoniyati mavjudligi ta’kidlandi.

Yig‘ilishda pandemiya davrida tarmoqni barqaror ishlatish uchun korxonalarni aylanma mablag‘ bilan ta’minlash masalasi ko‘rib chiqilgan.

Prezident 2020-yil 1-aprelga qadar sotilgan paxta tolasining yakuniy to‘lov muddatini 90 kundan 150 kunga uzaytirishga ko‘rsatma berdi.

Moliya vazirligiga korxonalarning aylanma mablag‘ini o‘zida saqlab qolish uchun eksport bojxonada rasmiylashtirilgan zahoti qo‘shilgan qiymat solig‘ini qaytarib berish mexanizmini joriy qilish topshirig‘i berilgan.

Kelgusi 5 yilda tayyor mahsulot ishlab chiqarishni 4-5 baravarga ko‘paytirish, tannarxni raqobatchilarga nisbatan arzonlashtirib, tashqi bozorlarni egallash bo‘yicha ham topshiriqlar berildi. Buning uchun mahsulotlar assortimentini kengaytirib, sifatini keskin oshirish zarurligi alohida ta’kidlandi.

Jumladan, xorijiy kompaniyalar bilan birgalikda yirik eksport korxonalari tashkil etib, taniqli brendlar asosida bozorbop mahsulotlar ishlab chiqarish yuzasidan ko‘rsatma berildi.

Namangan, Samarqand va Toshkent viloyatlarida tayyor mahsulot eksport qiluvchi yangi korxonalar uchun texnopark tashkil etiladi. Ushbu loyihalarni moliyalashtirish uchun Tiklanish va taraqqiyot jamg‘armasi tomonidan kredit liniyasi doirasida 300 million dollar mablag‘ ajratiladi.

Yig‘ilishda xomashyo yetishtirish va ishlab chiqarish zanjirida tannarxni kamaytirish masalasiga ham to‘xtalib o‘tildi.

Mamlakatda yillar davomida paxta tolasining o‘zi eksport qilingani uchun uning narxi Liverpul kotirovkasiga bog‘langan edi. Aslida paxta tolasi Nyu-York birjasida sotiladi va uning narxi Liverpulnikidan 10 foizga arzon yuradi.

Bu to‘qimachilik mahsulotlari qiymati oshishiga ta’sir qilayotgani qayd etilib, mutasaddilarga paxta tolasi narxini xalqaro birja kotirovkasiga o‘tkazish yuzasidan topshiriq berildi.

Yig‘ilishda to‘qimachilik korxonalarining tashqi bozorlarga chiqishi uchun qulay sharoit yaratish masalalariga ham e’tibor qaratildi, deyiladi xabarda.