Samarqandda qo‘shnilarini haqoratlagan mast fuqaro va qochoq haydovchi qamoqqa olindi

Samarqandda qo‘shnilarini haqorat qilgan mast fuqaro va IIB xodimlaridan qochgan Damas haydovchisi 15 sutkaga qamaldi. Bu haqda “Daryo” muxbiri xabar bermoqda.

2020-yilning 5-aprel kuni taxminan soat 21:00 atrofida Samarqand tumani “Quyi Chordara” mahallasida yashovchi 28 yoshli fuqaro S.N. spirtli ichimlik iste’mol qilgan holda qo‘shnilarining darvoza va derazalarini taqillatib, hech bir sababsiz uyatli so‘zlar bilan haqorat qilgan.

Qo‘shnilari tinchligini buzib, mayda bezorilik harakatlarini sodir qilgan S.N. Ma’muriy javobgarlik to‘g‘risidagi kodeksning 54-moddasi 1-qismi (Epidemiyalarga qarshi kurash qoidalarini buzish) va 183-moddasi (Mayda bezorilik)da nazarda tutilgan huquqbuzarlik harakatlarini sodir qilganlikda ayblanib, 1 million 115 ming so‘m miqdorida jarimaga tortildi va  15 sutka ma’muriy qamoq bilan jazolandi.

Shuningdek, 10-aprel kuni mazkur tumanda yashovchi 19 yoshli fuqaro R.O. boshqaruvchidagi Damas’ida “Oqmachit” mahallasidagi blokpostda xizmat vazifasini o‘tayotgan IIB xodimlarining qonuniy talablarini bajarmasdan, voqea joyidan qochib ketgan.

R.O.ning avtomashinasi to‘xtatilib tekshirilganda, karantinda transport vositasidan foydalanish huquqini beruvchi maxsus ruxsatnomasi yo‘qligi aniqlangan. Bu ham yetmagandek, haydovchi IIB xodimlarini vakolatidan chiqishda ayblab, ommani IIB xodimlariga qarshi da’vat etgan.

Samarqand tuman ma’muriy sudi huquqbuzar R.O. ishini ko‘rib chiqib, uni Ma’muriy javobgarlik to‘g‘risidagi kodeksning 54-modda 2-qismi (Epidemiyalarga qarshi kurash qoidalarini buzish), 194-modda 1-qismi (Ichki ishlar organlari xodimining qonuniy talablarini bajarmaslik) va 195-modda (Ichki ishlar organlari xodimlarining o‘z xizmat burchlarini bajarishlariga qarshilik ko‘rsatish)lari bilan aybli deb topib, 5 million 575 ming so‘m jarima hamda 15 sutka ma’muriy qamoq bilan jazolashni lozim topgan.