Bundan roppa-rosa 17 yil avval, 2003-yil 23-aprel kuni, “Manchester Yunayted” va “Real” ishtirokida Yevropa Chempionlar Ligasining eng yorqin bahslaridan biri bo‘lib o‘tgandi.
Yulduzlar jangi
Ilk uchrashuvda qo‘lga kiritilgan 3:1 hisobidagi g‘alaba madridliklarning ustunligini ta’minlab turardi. “Real”ning yulduzli tarkibi 2001/02-yilgi mavsumni ko‘tarinki o‘tkazgan va yozda “Inter”dan Ronaldoni sotib olgandi. Biroq Madriddagi bahsda braziliyalik o‘yinchi emas Raul katta sahnaga chiqadi va dubl qayd etgan holda jamoasining g‘alabasiga hissa qo‘shadi. Biroq Raul javob o‘yinini ko‘richak bo‘lib qolgani sabab o‘tkazib yuboradi.Birinchi uchrashuvdagi mag‘lubiyatdan so‘ng Fergyuson o‘yinga jangovar tarkibni tashlaydi. O‘z navbatida “galaktikos” ham yulduzli tarkibi bilan ishtirok etadi.
“Manchester Yunayted”: Bartez, Braun, Ferdinand, Silvestr, Oshi, Batt, Kin, Veron, Sulsher, Giggz, van Nistelroy.
“Real Madrid”: Kasilyas, Yerro, Elgera, Salgado, Roberto Karlos, Makalele, Makmanaman, Figu, Zidan, Guti, Ronaldo.
Asosiy yulduzlar
Ronaldo: So‘yloq 2002-yilgi Jahon Chempionatida porlagan, sakkizta gol urgan holda Braziliyaning chempionligiga muhim hissa qo‘shgandi. “Manchester Yunayted”ga qarshi o‘yingacha u madridliklar safida Chempionlar Ligasida bor yo‘g‘i ikkita gol urgandi. Raul yo‘qligi sabab “Old Trafford”da asosiy markaziy hujumchi sifatida faqat o‘zi qolgandi.Rud van Nistelroy: Niderlanliyalik futbolchi YChL 2001/02-yilgi mavsumida 10 ta gol bilan to‘purarga aylangan, “Real”ga qarshi chorak final bahsiga qadar esa 2002/03-yilgi mavsumda 11 ta to‘p kiritishga ulgurgandi.
Devid Bekhem: “Arsenal”ga qarshi Kubok bahsidan so‘ng futbolchi va jamoa bosh murabbiyi Aleks Fergyuson o‘rtasida o‘sha mashhur janjal sodir bo‘lgandi. Natijada Bekhem zaxirada ko‘p qolib ketar, uning jamoani tark etishi deyarli aniq bo‘lib qolgandi.
Ronaldo — fenomen, Bekhem esa betakror
O‘yin kutilganidek “qizil iblislar”ning bosimi bilan boshlanadi. Dastlabki xavfli vaziyatni maydon egalari uyushtiradi, biroq van Nisteroy imkoniyatdan foydalana olmaydi. Madrid klubi esa dastlabki qarshi hujumni golga aylantiradi. Makmanaman, Figu, Zidan va Gutining tezkor uzatmalaridan keyin Ronaldo qulay vaziyatga chiqib boradi va jarima maydoni tashqarisidan darvozani ishg‘ol qiladi.Birinchi bo‘lim oxirida van Nistelroy Ole-Gunnar Sulsherning uzatmasidan so‘ng muvozanatni tiklashga muvaffaq bo‘ladi, biroq umumiy hisob hanuz ispan klubi tomonida edi.
Tanaffusdan keyin Ronaldo jamoasining uzoq davom etgan hujumini aniq zarba bilan yakunlaydi. Biroq oradan ikki daqiqa o‘tib “Real” himoyachisi Ivan Elgera o‘z darvozasini ishg‘ol qilib qo‘yadi va o‘yinga yana intriga qaytadi. Ko‘p o‘tmay Figudan to‘pni qabul qilib olgan Ronaldo chamasi 25 metrlardan mukammal zarba yo‘llab, Bartezni dog‘da qoldiradi.
O‘yin taqdiri deyarli hal bo‘lgach Visente del Boske braziliyalik iqtidor egasini zaxiraga oladi. Shu vaqtda “Old Trafford”ga yig‘ilgan muxlislar o‘rnilaridan turgan holda Ronaldoni olqishlaydi.
Bu orada Bekhem ham maydonga tushgan va o‘yinning yakuni chiroyli bo‘lishini ta’minlab bergandi. 71-daqiqada Devid jarima zarbasini ideal darajada ijro etadi, Kasilyas qolganlar qatori faqat tomoshabin vazifasini o‘taydi.
O‘yin yakunlanishi arafasida angliyalik futbolchi dublni rasmiylashtiradi.
“Manchester Yunayted” uyida irodali g‘alabani qo‘lga kiritadi, biroq qarama-qarshilikdagi umumiy hisob 5:6 bilan yakunlanadi va “Real” yarim final sari yo‘l oladi.
O‘yindan keyingi fikrlar
Devid Bekhem: “Ronaldo bizni ko‘mib tashladi. Raul ko‘richak bo‘lib qolgandi, shu tariqa ularning yulduzi o‘yinni o‘ziga oldi. Barcha ishqibozlar o‘rnidan turgan holda uni qarsaklar bilan kuzatdi va unga “Yunayted” futbolchisiga qanday hurmat ko‘rsatilishini ko‘rsatib qo‘ydi. Manchester odamlari futbolni yaxshi tushunadi”.
Ronaldo: “Bu kechani hech qachon unutmayman”.
Visente del Boske: “Istalgan vaqtda o‘yin biror jamoaning ssenariysi ostida kechishi mumkin edi. Muxlislar futbolchilar kabi o‘zini qanday tutish borasida ajoyib namuna ko‘rsatdi. Fantastika”.
Aleks Fergyuson: “Bunday uchrashuvning ishtirokchisiga aylanish — ulkan rohat. Bu o‘yin orzulardagi futbolni ko‘rsatib berdi”.
Keyin nima bo‘ldi
“Desima” va Chempionlar Ligasi g‘olibligi juda yaqin edi, biroq madridliklar yarim finalda “Yuventus” to‘sig‘idan o‘ta olmaydi. Klub Ispaniya chempioniga aylanadi, ammo bu del Boskeni iste’fodan qutqarib qololmaydi. Uning o‘rnini Karlush Keyrush egallaydi. Shuningdek, “Real” yozda tarkibini Bekhem bilan to‘ldiradi.2003/04-yilgi mavsum “Real”ga ko‘plab sovrinlarni va’da qilyotgandek ko‘rinadi. Biroq mavsum oxiriga yaqin Ronaldo jarohat oladi. “Qirollik klubi” Ispaniya Kubogi finalida yutqazadi, YChL chorak finalida “Monako”ga imkoniyat boy beriladi, keyin esa ketma-ket beshta mag‘lubiyatdan so‘ng Ispaniya chempionligi “Valensiya”ga sovg‘a qilinadi...
Nodirxon Hamidxonov tayyorladi
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
Izoh (0)