Бундан роппа-роса 17 йил аввал, 2003 йил 23 апрель куни, «Манчестер Юнайтед» ва «Реал» иштирокида Европа Чемпионлар Лигасининг энг ёрқин баҳсларидан бири бўлиб ўтганди.
Юлдузлар жанги
Илк учрашувда қўлга киритилган 3:1 ҳисобидаги ғалаба мадридликларнинг устунлигини таъминлаб турарди. «Реал»нинг юлдузли таркиби 2001/02 йилги мавсумни кўтаринки ўтказган ва ёзда «Интер»дан Роналдони сотиб олганди. Бироқ Мадриддаги баҳсда бразилиялик ўйинчи эмас Рауль катта саҳнага чиқади ва дубль қайд этган ҳолда жамоасининг ғалабасига ҳисса қўшади. Бироқ Рауль жавоб ўйинини кўричак бўлиб қолгани сабаб ўтказиб юборади.Биринчи учрашувдаги мағлубиятдан сўнг Фергюсон ўйинга жанговар таркибни ташлайди. Ўз навбатида «галактикос» ҳам юлдузли таркиби билан иштирок этади.
«Манчестер Юнайтед»: Бартез, Браун, Фердинанд, Силвестр, Оши, Батт, Кин, Верон, Сульшер, Гиггз, ван Нистелрой.
«Реал Мадрид»: Касильяс, Ерро, Элгера, Салгадо, Роберто Карлос, Макалеле, Макманаман, Фигу, Зидан, Гути, Роналдо.
Асосий юлдузлар
Роналдо: Сўйлоқ 2002 йилги Жаҳон Чемпионатида порлаган, саккизта гол урган ҳолда Бразилиянинг чемпионлигига муҳим ҳисса қўшганди. «Манчестер Юнайтед»га қарши ўйингача у мадридликлар сафида Чемпионлар Лигасида бор йўғи иккита гол урганди. Рауль йўқлиги сабаб «Олд Траффорд»да асосий марказий ҳужумчи сифатида фақат ўзи қолганди.Руд ван Нистелрой: Нидерланлиялик футболчи ЕЧЛ 2001/02 йилги мавсумида 10 та гол билан тўпурарга айланган, «Реал»га қарши чорак финал баҳсига қадар эса 2002/03 йилги мавсумда 11 та тўп киритишга улгурганди.
Дэвид Бекҳэм: «Арсенал»га қарши Кубок баҳсидан сўнг футболчи ва жамоа бош мураббийи Алекс Фергюсон ўртасида ўша машҳур жанжал содир бўлганди. Натижада Бекҳэм захирада кўп қолиб кетар, унинг жамоани тарк этиши деярли аниқ бўлиб қолганди.
Роналдо — феномен, Бекҳэм эса бетакрор
Ўйин кутилганидек «қизил иблислар»нинг босими билан бошланади. Дастлабки хавфли вазиятни майдон эгалари уюштиради, бироқ ван Нистерой имкониятдан фойдалана олмайди. Мадрид клуби эса дастлабки қарши ҳужумни голга айлантиради. Макманаман, Фигу, Зидан ва Гутининг тезкор узатмаларидан кейин Роналдо қулай вазиятга чиқиб боради ва жарима майдони ташқарисидан дарвозани ишғол қилади.Биринчи бўлим охирида ван Нистелрой Оле-Гуннар Сульшернинг узатмасидан сўнг мувозанатни тиклашга муваффақ бўлади, бироқ умумий ҳисоб ҳануз испан клуби томонида эди.
Танаффусдан кейин Роналдо жамоасининг узоқ давом этган ҳужумини аниқ зарба билан якунлайди. Бироқ орадан икки дақиқа ўтиб «Реал» ҳимоячиси Иван Элгера ўз дарвозасини ишғол қилиб қўяди ва ўйинга яна интрига қайтади. Кўп ўтмай Фигудан тўпни қабул қилиб олган Роналдо чамаси 25 метрлардан мукаммал зарба йўллаб, Бартезни доғда қолдиради.
Ўйин тақдири деярли ҳал бўлгач Висенте дел Боске бразилиялик иқтидор эгасини захирага олади. Шу вақтда «Олд Траффорд»га йиғилган мухлислар ўрниларидан турган ҳолда Роналдони олқишлайди.
Бу орада Бекҳэм ҳам майдонга тушган ва ўйиннинг якуни чиройли бўлишини таъминлаб берганди. 71-дақиқада Дэвид жарима зарбасини идеал даражада ижро этади, Касильяс қолганлар қатори фақат томошабин вазифасини ўтайди.
Ўйин якунланиши арафасида англиялик футболчи дублни расмийлаштиради.
«Манчестер Юнайтед» уйида иродали ғалабани қўлга киритади, бироқ қарама-қаршиликдаги умумий ҳисоб 5:6 билан якунланади ва «Реал» ярим финал сари йўл олади.
Ўйиндан кейинги фикрлар
Дэвид Бекҳэм: «Роналдо бизни кўмиб ташлади. Рауль кўричак бўлиб қолганди, шу тариқа уларнинг юлдузи ўйинни ўзига олди. Барча ишқибозлар ўрнидан турган ҳолда уни қарсаклар билан кузатди ва унга «Юнайтед» футболчисига қандай ҳурмат кўрсатилишини кўрсатиб қўйди. Манчестер одамлари футболни яхши тушунади».
Роналдо: «Бу кечани ҳеч қачон унутмайман».
Висенте дел Боске: «Исталган вақтда ўйин бирор жамоанинг сценарийси остида кечиши мумкин эди. Мухлислар футболчилар каби ўзини қандай тутиш борасида ажойиб намуна кўрсатди. Фантастика».
Алекс Фергюсон: «Бундай учрашувнинг иштирокчисига айланиш — улкан роҳат. Бу ўйин орзулардаги футболни кўрсатиб берди».
Кейин нима бўлди
«Десима» ва Чемпионлар Лигаси ғолиблиги жуда яқин эди, бироқ мадридликлар ярим финалда «Ювентус» тўсиғидан ўта олмайди. Клуб Испания чемпионига айланади, аммо бу дел Боскени истеъфодан қутқариб қололмайди. Унинг ўрнини Карлуш Кейруш эгаллайди. Шунингдек, «Реал» ёзда таркибини Бекҳэм билан тўлдиради.2003/04 йилги мавсум «Реал»га кўплаб совринларни ваъда қилётгандек кўринади. Бироқ мавсум охирига яқин Роналдо жароҳат олади. «Қироллик клуби» Испания Кубоги финалида ютқазади, ЕЧЛ чорак финалида «Монако»га имконият бой берилади, кейин эса кетма-кет бешта мағлубиятдан сўнг Испания чемпионлиги «Валенсия»га совға қилинади...
Нодирхон Ҳамидхонов тайёрлади
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)