Shavkat Mirziyoyev karantin davrida qurilish hajmi kamayishiga yo‘l qo‘ymaslik zarurligini ta’kidladi

Shavkat Mirziyoyev 20-aprel, dushanba kuni, sanoat, qurilish va infratuzilma tarmoqlari korxonalarining to‘liq ishlashini ta’minlash masalalari bo‘yicha o‘tkazilgan videoselektor yig‘ilishida aholi bandligi va iqtisodiy barqarorlikni ta’minlash borasida katta imkoniyatlarga ega “drayver”lardan biri qurilish sohasi ekani, shu bois karantin davrida qurilish hajmi kamayishiga yo‘l qo‘ymaslik zarurligini ta’kidladi. Bu haqda Prezident matbuot xizmati xabar bergan.

Yig‘ilishda qurilish sohasi tarmog‘i 1 million 325 ming nafar aholini ish bilan ta’minlashi, boshqa sanoat yo‘nalishlari uchun ham talab yaratishi, karantin davrida qurilish hajmi kamayishiga yo‘l qo‘ymaslik maqsadida bu sohaga qo‘shimcha 3,6 trillion so‘m mablag‘ ajratilgani qayd etilgan.

2020-yilning birinchi choragida qurilish ishlari hajmi 6,5 foizga o‘sgan bo‘lsa-da, o‘tgan yilning shu davridan 4 foizga orqada qolayotgani aytilgan.

Yig‘ilishda karantin qoidalariga to‘liq rioya qilgan holda, barcha qurilishlarni davom ettirishga ruxsat berilishi va bunda Ichki ishlar vazirligiga soha korxonalari, qurilish materiallari ishlab chiqaruvchilarning harakatlanishiga sharoit yaratish vazifasi yuklatilgan.

2020-yilda 30 ming xonadonli ko‘p qavatli uylar foydalanishga topshirilishi rejalashtirilgan. Lekin 25 ta shaharda buning uchun yer maydonlari haligacha ajratilmagani, ipoteka krediti olish bo‘yicha arizalarni ko‘rib chiqishda ham sustkashlikka yo‘l qo‘yilgani, bu kamchiliklarni tez kunlarda bartaraf etish, ko‘p qavatli uylar uchun yerni aholi talablari yuqori bo‘lgan hududlardan ajratish zarurligi ham ta’kidlandi.

Tadbirkorlik faoliyatini qo‘llab-quvvatlash davlat jamg‘armasi tomonidan xususiy pudrat tashkilotlariga kreditlarning foiz xarajatlarini qisman qoplash va kredit summasining 50 foizigacha kafolat berish mexanizmi joriy etilishi belgilandi.

Yangi tartib asosida berilayotgan ipoteka kreditlari muddatini 15 yildan 20 yilga uzaytirish, shuningdek, ipoteka kreditining eng yuqori chegarasini bozor talablari asosida ko‘paytirish kerakligi qayd etildi.

Qurilish sifatini oshirish, soha korxonalari faoliyatini baholash reytingi va elektron tender tizimini ishga tushirishni jadallashtirish bo‘yicha topshiriqlar berildi. Yig‘ilishda qurilish materiallari bozori bilan bog‘liq masalalar ham atroflicha muhokama qilindi. Karantin davrida qurilish industriya korxonalarida ishlab chiqarish hajmi 30-40 foizga kamaygani, xomashyo mahsulotlari ham sotilmay qolgani aytildi.

Shundan kelib chiqib, “O‘zqurilishmateriallari” aksiyadorlik kompaniyasiga birinchi yarim yillikda mahsulot ishlab chiqarishni 10 trillion so‘m va yil oxirigacha 22 trillion so‘mga yetkazish vazifasi yuklatildi.

Import o‘rnini bosuvchi mahalliy qurilish materiallari ishlab chiqarishni kengaytirish bo‘yicha ham topshiriqlar berilib, O‘zbekistonda buning uchun zarur xomashyo olish mumkin bo‘lgan 275 ta istiqbolli kon mavjudligiga urg‘u berildi. G‘ozg‘onda 52 million dollarlik 14 ta loyiha ishga tushirilayotgani, konlarni o‘zlashtirish orqali shunday samarali loyihalarni ko‘paytirish zarurligi Prezident tomonidan ta’kidlab o‘tildi.

2020-yilda energiya tejamkor qurilish materiallari tayyorlash bo‘yicha 7 ta loyihani ishga tushirish, kelgusidagi obyektlarni loyihalashda ushbu mahsulotlardan foydalanishni nazarda tutish yuzasidan ko‘rsatmalar berildi.

Karantin davrida muhandislik-kommunikatsiya infratuzilmasi qurilishiga Inqirozga qarshi kurash jamg‘armasidan qo‘shimcha 1,5 trillion so‘m, xususan, suv ta’minoti bo‘yicha 55 ta loyihaga 500 milliard so‘m va yo‘l qurilishi bo‘yicha 1 ming 547 ta loyihaga 1 trillion so‘m mablag‘ ajratilgan.

Yig‘ilishda bu loyihalarning ijrosi ham ko‘rib chiqildi. Pudratchilarni aniqlab, qurilish ishlarini tez fursatlarda boshlash muhimligi qayd etildi.

Pandemiya sababli xalqaro moliya tashkilotlari mablag‘lari ishtirokidagi loyihalar ham to‘xtab qolgani, xususan, ichimlik suvi tizimini yaxshilash hamda yo‘l qurilishi sohasida shunday muammolar mavjudligi hozirgi vaziyatdan kelib chiqib, bunday loyihalarga tender orqali mahalliy pudrat tashkilotlarini ham jalb qilish zarurligi yuzasidan tavsiyalar berildi.

Davlat tomonidan mahalliy budjetlar daromadini oshirish, jumladan, yo‘l qurilishi uchun mablag‘larni shakllantirishga barcha sharoitlar yaratilgani va endi hududlar respublikadan mablag‘ kelishini kutib o‘tirmasdan, ichki yo‘llarni o‘zlari ta’mirlashi zarurligi aytib o‘tildi.

“Umuman olganda, uy-joy qurilishi bo‘ladimi yoki infratuzilma obyektlarimi, qurilish sohasi yangi ish o‘rinlarini yaratish, bozorda talab va taklifni shakllantirish, pirovardida iqtisodiy o‘sishni ta’minlash uchun katta imkoniyat va zaxira hisoblanadi. Tarmoq rahbarlari bugungi yig‘ilishda o‘zlariga yuklatilgan mas’uliyatni chuqur his etib, ishlarni to‘g‘ri tashkil etsalar, iqtisodiy inqirozdan imkon qadar kam yo‘qotishlar bilan chiqib ketamiz”, — dedi Shavkat Mirziyoyev.