Nyu-York shtatida koronavirus sabab fuqarolarning onlayn to‘y qilishiga ruxsat berildi

AQShning Nyu-York shtatida nikoh marosimlarini onlayn o‘tkazishga ruxsat berildi. Bu haqda shtat gubernatori Endryu Kuomo Twitter’da ma’lum qilgan.

Ushbu qaror chiqarilishiga koronavirus pandemiyasi sabab bo‘lgan. Nikoh qayd etilgani haqidagi guvohnomani endi internet orqali olish, ro‘yxatdan esa videokonferensaloqa formatida o‘tish mumkin.

Jons Hopkins universitetining 20-aprel Toshkent vaqti bilan 00:30 da bergan ma’lumotiga ko‘ra AQShda 742 mingdan ortiq kishida koronavirus qayd etilgan, 40 mingdan ortiq odam esa kasallik oqibatida vafot etgan. 66 ming bemor kasallikdan tuzalgan.

17-aprelda AQSh prezidenti Donald Tramp shtatlardagi hukumat vakillariga COVID-19 sabab o‘rnatilgan cheklov me’yorlarini yengillashtirish bo‘yicha mustaqil qaror chiqarish vakolati berilishini bildirgan. Uning so‘zlariga ko‘ra karantinning bekor qilinishi uch bosqichda amalga oshiriladi. Bir oy ichida AQShda 20 milliondan ortiq odam ishsiz qoldi. The Wall Street Journal hamda NBC News o‘tkazgan so‘rovnomaga ko‘ra ko‘pchilik AQShda cheklovlarni juda tez olib tashlanishi mumkinligidan xavotirda.