Adliya vazirligi FHDYo tuman bo‘limlari xodimlarini o‘z xohishlari bilan haq to‘lanmaydigan ta’tilga chiqarilayotganiga izoh berdi

Adliya vazirligi tizimidagi FHDYo bo‘limlarida kechiktirib bo‘lmaydigan holatlardagina tashkil qilingan darcha orqali amalga oshiriladi. Bu haqda 18-aprel, shanba kuni, AOKAda bo‘lib o‘tgan brifingda Adliya vazirligi axborot xizmati rahbari Sevara O‘rinboyeva ma’lum qildi.

Brifingda Adliya vazirligi vakili FHDYo tuman bo‘limlari mudir va 1 nafar inspektoridan tashqari boshqa xodimlar o‘z xohishlari bilan haq to‘lanmaydigan ta’tilga chiqarilayotganiga izoh berib o‘tdi.

Koronavirus infeksiyasi tarqalishiga qarshi kuchaytirilgan tartib joriy etilishi munosabati bilan 2020-yilning 25-martidan boshlab Adliya vazirligi tizimidagi FHDYo bo‘limlarida fuqarolarni qabul qilish xodimlarning navbatchiligi asosida kechiktirib bo‘lmaydigan holatlardagina (tug‘ilish va o‘lim haqidagi dalolatnoma yozuvlarini qayd qilish) tashkil qilingan darcha orqali amalga oshirib kelinmoqda.

Yagona interaktiv davlat xizmatlari portali (my.gov.uz) orqali onlayn ariza topshirishingiz mumkin.

O‘zbekiston Prezidentining ‘Koronavirus pandemiyasi va global inqiroz holatlarining iqtisodiyot tarmoqlariga salbiy ta’sirini yumshatish bo‘yicha birinchi navbatdagi chora-tadbirlar to‘g‘risida’gi farmoniga ko‘ra, karantinga oid choralar amal qilishi davrida ish beruvchilar xodimlarni, ayniqsa, homilador ayollar, keksalar, imkoniyati cheklangan hamda surunkali kasallikka chalingan shaxslarni, ularning roziligi bilan, masofadan turib ishlash usuliga, qulay ish grafigiga yoki uydan turib ishlashga o‘tkazishlari mumkin.

Vazirlar Mahkamasining ‘Koronavirus infeksiyasi tarqalishiga qarshi qo‘shimcha chora-tadbirlar to‘g‘risida’ qaroriga ko‘ra, idoraviy bo‘ysunuvi va tashkiliy-huquqiy shaklidan qat’i nazar barcha tashkilotlarning asosiy ish faoliyatiga ta’sir etmagan holda qonun hujjatlarida belgilangan tartibda xodimlarni mehnat ta’tiliga chiqarish, qolgan qismining mehnat faoliyatini maksimal darajada masofadan turib (‘onlayn’ rejimda yoki masofaviy tarzda) tashkil etish choralari ko‘rilishi belgilangan.

Mehnat qonunchiligiga ko‘ra, xodimning arizasiga binoan unga ish haqi saqlanmagan holda ta’til berilishi mumkin, uning davomiyligi xodim va ish beruvchi o‘rtasidagi kelishuvga ko‘ra belgilanadi, lekin u o‘n ikki oylik davr mobaynida jami uch oydan ortiq bo‘lmasligi kerak.

Bu yerda ish haqi saqlanmagan holda ta’tilga chiqish uchun xodim ham ish beruvchi ham rozi bo‘lishi kerak, xodim o‘z xohishi bilan chiqayotgan bo‘lsa, bu yerda hech qanday muammo yo‘q. Xodim o‘z xohishi bilan ish haqi saqlanmagan mehnat ta’tiliga chiqmoqchi bo‘lsa, bunga ish beruvchi rozi bo‘lsa bo‘ldi. Bularning hammasi qonuniy.