Uzmobile компаниясининг мавжуд 2G, 3G база станциялари LTE 4G стандартига ўтказилиши маълум қилинди. Бу ҳақда АОКА ҳузурида ташкил этилган штабдаги брифингда Ахборот технологиялари ва коммуникацияларини ривожлантириш вазирлиги матбуот котиби Шерзод Аҳматов маълумот бериб ўтди.
«7 апрель куни ‘Ўзбектелеком’ Uzmobile филиали техник хизмати Тошкент шаҳрида уяли алоқа тармоғини модернизация қилиш ва кенгайтириш, шунингдек, LTE қамров зонасини кенгайтириш лойиҳалари ишларини якунлади. Uzmobile техник жамоаси карантин даврида ҳам хизмат кўрсатмоқда. Лойиҳа доирасида барча мавжуд 2G, 3G база станциялари LTE 4G стандартига ўтказилади, бу эса ўз навбатида, Uzmobile абонентлари учун кенг полосали мобил алоқа хизматларидан фойдаланишда тезлик ва имкониятларини оширишда ҳиссасини қўшади. Ушбу хизматлар вилоятларда ҳам амалга оширилади».
Шунингдек, брифинг давомида мобил алоқа хизматларининг сифати талабга жавоб бермаётганлиги масаласига ҳам тўхталиб ўтилди. Ушбу масала юзасидан АКТ вазирлиги ҳузурида мобил алоқа операторлари ва провайдерларнинг мурожаатларини қабул қилувчи call-марказда 650 дан ортиқ ходимлар, 1000 дан зиёд мутахассислар ишлаётгани, улар 300 дан зиёд автотранспорт воситалари ҳамда ҳимоя анжомлари билан таъминлангани айтилди. Мобил алоқа операторлари томонидан бугунги кунда сифатни яхшилаш учун 302 дан ортиқ база станциялари модернизация қилингани, мобил алоқа учун мижозлар аввалдан тузилган шартномада кўрсатилган тезликда хизматдан фойдаланаётганликлари қўшимча қилинди.Мавзуга доир: Ўзбекистон интернет тезлиги бўйича жаҳон рейтингида бир ой ичида яна 7 поғонага кўтарилди
Изоҳ (0)