O‘zbekiston Bosh prokuraturasi koronavirus pandemiyasi sababli mamlakatda yuzaga kelgan vaziyat hamda prokuratura idoralarining pandemiyaga qarshi kurash borasidagi vazifalari yuzasidan aholiga murojaat qildi.
Qayd etilishicha, Bosh prokuratura tegishli vakolat hamda majburiyatlar doirasida global inqiroz va pandemiya sharoitida prokuratura organlari tomonidan amalga oshirilishi shart bo‘lgan qo‘shimcha vazifalarni belgilab oldi.
Jumladan, bugungi murakkab vaziyatda prokuratura organlari tomonidan quyidagi vazifalar ijrosiga ustuvor ahamiyat qaratiladi.
Birinchidan, karantin munosabati bilan joriy etilgan cheklovlarda og‘ir vaziyatga tushib qolgan oilalar, shuningdek, vaqtinchalik daromad manbaini yo‘qotgan fuqarolarni ijtimoiy qo‘llab-quvvatlash choralari prokuratura idoralari tomonidan alohida nazoratga olinadi.
Prokuror sektorlarida ana shunday vaziyatdagi 5 mingta oilaga karantin davrida bevosita prokuratura organlari tomonidan belgilangan miqdorlarda moddiy yordam ko‘rsatiladi.
Ikkinchidan, ish haqi, pensiya va nafaqa to‘lovlarining to‘liqligi va uzluksizligi ustidan qat’iy nazorat olib boriladi. Bu jarayonda ijtimoiy adolat va qonuniylikni ta’minlashning barcha zarur choralari ko‘riladi.
Uchinchidan, karantin davrida aholini asosiy turdagi oziq-ovqat mahsulotlari, dori-darmon va tibbiy buyumlar bilan uzluksiz ta’minlash, narx-navoni barqaror saqlash choralari ko‘riladi.
“Daladan dasturxonga” tamoyili asosida qishloq xo‘jaligi va boshqa mahsulotlar ishlab chiqaruvchilardan bevosita iste’molchilarga, asosiysi, mahallalarda ko‘chma savdoni tashkil etish orqali fuqarolarga eng yaqin va qulay hududlarga yetkazib beriladi.
To‘rtinchidan, koronavirus pandemiyasining iqtisodiyotga ta’sirini yumshatish borasidagi chora-tadbirlar doirasida tadbirkorlarni qo‘llab-quvvatlash, karantin cheklovlari, sanitariya va gigiyena talablariga rioya etgan holda ularning faoliyati to‘xtab qolishiga yo‘l qo‘ymaslikning barcha zarur choralari ko‘riladi. Tadbirkorlarga soliq to‘lovlari, bank kreditlari hamda kommunal to‘lovlar bo‘yicha berilgan imtiyozlarning to‘liq qo‘llanilishi ustidan nazorat olib boriladi.
Eksportyorlarni qo‘llab-quvvatlash, eksport prognozi bajarilishini ta’minlash bo‘yicha tizimli ishlar amalga oshiriladi. Bunda 3379 nafar eksportchining har biriga prokuratura xodimlari biriktirilib, yuzaga kelayotgan muammolar birgalikda hal etiladi va ularga zarur amaliy yordam ko‘rsatiladi. Mazkur amaliyot 30 nafardan ortiq ish o‘rniga ega, yirik oziq-ovqat ishlab chiqaruvchilari bilan ham yo‘lga qo‘yiladi.
Yuk tashishda turli to‘siq va muammolar vujudga kelishining oldini olish yuzasidan zarur choralar ko‘rib boriladi. Mavjud 516 ta karantin postiga biriktirilgan prokuratura xodimlari bu borada alohida ish olib boradi.
Davlat hamda hududiy investitsiya dasturlari ijrosi ustidan nazorat yanada kuchaytiriladi. Budjet tushumi ijrosini ta’minlash va yangi tushum manbalarini aniqlashga faol ko‘maklashiladi.
Beshinchidan, oziq-ovqat xavfsizligini ta’minlash choralari doirasida prokuror sektorlarida g‘alla parvarishi, chigit ekilishi, shuningdek, aholi tomorqalarida ekinlar to‘liq ekilishini ta’minlash choralari ko‘riladi.
Oltinchidan, karantin cheklovlari davrida huquqbuzarliklar profilaktikasi va jinoyatchilikka qarshi kurashish ishlari bir zum ham to‘xtatilmaydi. Bunda fuqarolarning karantin qoidalariga so‘zsiz rioya etishini ta’minlash, shuningdek, koronavirus pandemiyasi haqida asossiz xabarlar tarqatish, aholi orasida sarosima va vahima keltirib chiqarishga urinishlarning oldini olishga alohida e’tibor qaratiladi.
Yettinchidan, koronavirus infeksiyasiga chalingan bemorlar bilan muloqotda bo‘lgan fuqarolarni aniqlash va ularning salomatligini nazoratga olishda prokuratura tergovchilari sanitariya-epidemiologiya nazorati xizmatlariga yaqindan ko‘maklashib boradi.
Bosh prokuratura o‘z murojaatida koronavirus tarqalishining oldini olish hamda uning ustidan g‘alaba qozonish uchun aholidan hushyorlik va ogohlikni kuchaytirishni, karantin bilan bog‘liq joriy etilgan barcha tartib-qoidalarga so‘zsiz va qat’iy amal qilishni so‘ragan.
Avvalroq Bosh prokuratura fuqarolardan koronavirus tarqalishining oldini olish maqsadida kundalik yuritishni so‘ragan edi. Shuningdek, Bosh prokuratura xodimlari ikki marta o‘z maoshlarining bir qismini koronavirus infeksiyasiga qarshi kurashga xayriya qilgandi.
Izoh (0)