O‘zbekiston terma jamoasi sobiq futbolchisi, hozirda O‘zbekiston U-14 terma jamoasi bosh murabbiyi Server Jeparov 14 kunlik karantindan so‘ng maxsus jihozlangan konteynerlardagi sharoit haqida fikr bildirdi.
“O‘z xalqi uchun qayg‘urayotgan Prezidentimiz Shavkat Mirziyoyevga rahmat. Shaxsiy fikrimcha, konteynerlar karantinda yashash uchun barcha kerakli ashyolar bilan ta’minlangan.
To‘rt kishi yashadik. Toza matras va to‘shakka ega ikki qavatli karavot. Televizor, konditsioner, hojatxona, yuvinish xonasi, issiq-sovuq suv, statsionar telefon, suv qaynatish va choy damlash uchun choynaklar. Barcha gigiyena va tozalash vositalari. Kuniga uch mahal ovqat: kotlet, tovuq, guruch, grechka, perlovka, makaron, palov, suv, salatlar va mevalar. Ularning barchasini bir martalik idishlarda olib kelishdi.
Xizmat ko‘rsatgan barcha xodimlar, bizdan qon tahlili olgan shifokorlar va 14 kun mobaynida maishiy muammolarni hal qilishda yordam bergan barchaga tashakkur, bu haqiqatda qahramonlik. Oson bo‘lmadi, biroq biz buni uddaladik. Yana bir bor Prezident va uning jamoasiga rahmat aytaman. Endi o‘g‘lim bilan birga uy karantinida bo‘lamiz. Keling, karantin qoidalariga rioya qilgan holda birdamlikda pandemiya bilan kurashamiz, faqat shu tariqa COVID-19 virusini yenga olamiz”, — deya yozadi Jeparov Instagram sahifasida.
Server Jeparov va uning o‘g‘li Raul Rossiyaning Qozon shahridan yetib kelgach 14 kunlik karantinga olingandi.
https://www.instagram.com/p/B-3suK0HuG4/
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
Izoh (0)