Sirdaryoda evakuatordagi Matiz’ning tezlikni oshirib, “radar”ga tushgani yuzasidan rasmiy izoh berildi

Sirdaryo viloyati IIB YHXB axborot xizmati Guliston shahrida Matiz’ning evakuatorga ortib olib ketilayotgan chog‘da tezlikni o‘lchovchi moslama bilan belgilangan tezlikdan ortiq harakat qilgani uchun jarimaga tortilgani haqidagi xabarlarga rasmiy munosabat bildirdi.

Unga ko‘ra, 9-aprel, payshanba kuni, Guliston shahri hududida o‘tkazilayotgan reyd tadbiri davomida Matiz haydovchisi karantin qoidalarini buzib, viloyat markazida harakatlanib yurganligi sababli haydovchiga nisbatan ma’muriy bayonnoma rasmiylashtirilib, avtomashina jarima maydonchasiga joylashtirishga jo‘natilgan.

Mercedes-Benz Sprinter maxsus evakuator yuk mashinasi Matiz’ni jarima maydonchasiga olib ketayotib, O‘zbekiston ko‘chasida yuqori tezlik 60 km/soat belgilangan joyda 70 km/soat tezlikda harakatlangan chog‘ida “radar”ga tushgan.

“Radar” tezlik o‘lchovchi moslama avtomatik tartibda ushbu maxsus evakuator avtomashinasi ustiga ortilgan Matiz’ning davlat raqamini ham suratga olib KSUBD bazasiga jo‘natgan.

Qaror ijro etilishi uchun Sirdaryo viloyati IIB YHXB mas’ul xodimiga kelib tushganidan so‘ng esa uning asosliligini va boshqa rekvizitlari to‘g‘riligini tasdiqlash vaqtida faqatgina Mercedes-Benz Sprinter maxsus evakuator yuk mashinasi tezlikni oshirganligi sababli jarima solish to‘g‘risidagi qaror tasdiqlanib, qoidabuzarning yashash manziliga pochta orqali jo‘natilgan.

Bu holatda ijtimoiy tarmoqlarda “Matiz avtomashinasi haydovchisi uyiga jarima xati keldi”, deb noto‘g‘ri talqin qilingan. Aslida faqatgina maxsus evakuator avtomashinasiga nisbatan jarima qarori tasdiqlangan va transport vositasi egasining yashash manziliga jo‘natilgan.

Matiz haydovchisiga nisbatan qaror tasdiqlanmagan va haydovchining uyiga hech qanday jarima xati bormagan, deyiladi Sirdaryo viloyati IIB YHXB axborot xizmatining xabarida.