Сирдарё вилояти ИИБ ЙҲХБ ахборот хизмати Гулистон шаҳрида Matiz’нинг эвакуаторга ортиб олиб кетилаётган чоғда тезликни ўлчовчи мослама билан белгиланган тезликдан ортиқ ҳаракат қилгани учун жаримага тортилгани ҳақидаги хабарларга расмий муносабат билдирди.
Унга кўра, 9 апрель, пайшанба куни, Гулистон шаҳри ҳудудида ўтказилаётган рейд тадбири давомида Matiz ҳайдовчиси карантин қоидаларини бузиб, вилоят марказида ҳаракатланиб юрганлиги сабабли ҳайдовчига нисбатан маъмурий баённома расмийлаштирилиб, автомашина жарима майдончасига жойлаштиришга жўнатилган.
Mercedes-Benz Sprinter махсус эвакуатор юк машинаси Matiz’ни жарима майдончасига олиб кетаётиб, Ўзбекистон кўчасида юқори тезлик 60 км/соат белгиланган жойда 70 км/соат тезликда ҳаракатланган чоғида «радар»га тушган.
«Радар» тезлик ўлчовчи мослама автоматик тартибда ушбу махсус эвакуатор автомашинаси устига ортилган Matiz’нинг давлат рақамини ҳам суратга олиб КСУБД базасига жўнатган.
Қарор ижро этилиши учун Сирдарё вилояти ИИБ ЙҲХБ масъул ходимига келиб тушганидан сўнг эса унинг асослилигини ва бошқа реквизитлари тўғрилигини тасдиқлаш вақтида фақатгина Mercedes-Benz Sprinter махсус эвакуатор юк машинаси тезликни оширганлиги сабабли жарима солиш тўғрисидаги қарор тасдиқланиб, қоидабузарнинг яшаш манзилига почта орқали жўнатилган.
Бу ҳолатда ижтимоий тармоқларда «Matiz автомашинаси ҳайдовчиси уйига жарима хати келди», деб нотўғри талқин қилинган. Аслида фақатгина махсус эвакуатор автомашинасига нисбатан жарима қарори тасдиқланган ва транспорт воситаси эгасининг яшаш манзилига жўнатилган.
Matiz ҳайдовчисига нисбатан қарор тасдиқланмаган ва ҳайдовчининг уйига ҳеч қандай жарима хати бормаган, дейилади Сирдарё вилояти ИИБ ЙҲХБ ахборот хизматининг хабарида.
Мавзуга доир:
Изоҳ (0)