O‘zbekistonda koronavirusga chalinganlar soni 8-aprel Toshkent vaqti bilan soat 23:00 holatiga ko‘ra, 1 nafarga oshib, 546 kishiga yetdi. Bu haqda Sog‘liqni saqlash vazirligi xabar berdi. Avvalroq 8-aprel Toshkent vaqti bilan soat 17:15 holati bo‘yicha virusni yuqtirib olganlar soni 11 kishiga oshib, 545 nafarga yetgani ma’lum qilingandi.
O‘zbekistonda 15 martdan (mamlakatda kasallik ilk bor aniqlanganidan) beri 30 kishi undan sog‘aydi. 7-aprel soat 10:00 holatiga ko‘ra, Toshkentdagi kamida 23 bemorda pnevmoniya alomatlari kuzatilayotgan edi, yetti bemorning ahvoli og‘ir deb baholangan, ulardan biri o‘ta og‘ir ahvolda ekani aytilgan edi.
O‘zbekistonda koronavirusga chalinib, vafot etganlar soni uch nafarga yetdi: 7-aprel oqshomida koronavirusga chalingan bemorning ahvoli keskin yomonlashib, yurak va o‘pka yetishmovchiligi sabab, uning yuragi to‘xtab qolib, bemor vafot etgani haqida xabar berilgandi. 27-mart kuni Namangan viloyatida koronavirusga chalingan 72 yoshli onaxon miokard infarktidan vafot etgandi, 28-mart kuni Toshkentda 39 yoshli shifokor uy sharoitida o‘zini koronavirusdan davolashga urinib, oxir-oqibat vafot etgani haqida xabar berilgandi.
Mavzuga doir: Shavkat Mirziyoyev O‘zbekistonda koronavirusdan vafot etgan 3-bemorning oilasiga hamdardlik bildirdi
O‘zbekistondan tashqari Avstriya, Armaniston, AQSh, BAA, Janubiy Koreya, Pokiston, Rossiya, Tailand va Qozog‘istonda ham jami 23 nafar o‘zbekistonlik koronavirusga chalingan, ulardan uch nafari (barchasi AQShda) vafot etgan. Vafot etganlardan biri O‘zbekistonda xizmat ko‘rsatgan artist Rustam Samarqandiy edi.
Izoh (0)