Filippin prezidenti Rodrigo Duterte politsiya va qurollari kuchlarga karantin vaqtida tinchlik va tartibni buzib, norozilik namoyishini o‘tkazayotgan fuqarolarga qarata o‘q uzish bo‘yicha ko‘rsatma berdi, deb xabar qiladi Tengrinews.
Philippine Star gazetasining yozishicha, bu boradagi tegishli buyruq Keson-Siti shahrining o‘nlab vakillari mahalliy hukumatdan oziq-ovqat va boshqa yordamlarni so‘rab uyushtirgan namoyishidan so‘ng berilgan. Norozilik namoyishining 20 dan ortiq ishtirokchisi qo‘lga olingan.
“Politsiya va armiyaga buyurama, agarda hayotingizga xavf tug‘diradigan mojaro yoki janjal yuzaga kelsa, qonunbuzarlarga qarata o‘q otib, ularni yer tishlating”, — deydi Duterte.
Filippin milliy politsiyasi rahbari Archi Gamboaning aytishicha, huquq-tartibot organlari xodimlari hech kimni o‘ldirmaydi. “Albatta, yo‘q. Prezident mubolag‘a qilgan ko‘rinadi”, — deydi Gamboa.
Hozirda Filippinda koronavirus bilan 2,3 mingdan ortiq odam kasallangan, 96 kishi vafot etgan.
Eslatib o‘tamiz, dunyo bo‘yicha koronavirus bilan kasallanganlar soni 1 milliondan oshib ketdi. O‘tgan bir sutka ichida AQShning o‘zida mingdan ortiq odam vafot etdi. Xitoy hukumati koronavirus qurbonlari uchun 4-aprelni motam kuni deb e’lon qildi.
Izoh (0)