Rossiyada koronavirus tarqalishi yozga kelib tugallanishi lozim, ammo infeksiya tarqalishining avj pallasiga hali yetib kelmadi, deb xabar bermoqda “RIA Novosti”. Bu haqda Rossiya federal tibbiy-biologik agentligi (FTBA)ning yuqumli kasalliklar bo‘yicha bosh mutaxassisi Vladimir Nikiforov ma’lum qilgan.
“U oxir-oqibat yozda tugallanishi aniq”, — degan Nikiforov Rossiyaning “Birinchi kanal”ida namoyish etilgan “Dok-tok” dasturi efirida. Shu bilan birga, mutaxassisning fikricha, kasallik kelasi haftaning o‘rtalari, 8—10-aprel kunlari o‘zining avj pallasiga chiqadi.
Uning qo‘shimcha qilishicha, bunday respiratorli infeksiyalarda odatda shunday ko‘tarilish sodir bo‘ladi, keyin esa taxminan 10-12 hafta davom etuvchi pasayish kuzatiladi.
Rossiyada koronavirusga chalinish bo‘yicha dastlabki holat yanvar oyining oxirlarida qayd etilgan. Hozirda mamlakatda COVID-19 bilan 3,5 mingdan ortiq kishi kasallangan, shulardan 235 nafari tuzalgan, o‘lim holati esa 30 tani tashki etgan.
Avvalroq Rossiyada koronavirusga qarshi kurash uchun 3 turdagi dori ishlab chiqilgani, virusni aniqlash bo‘yicha 2 ta yangi test tizimi yaratilgani haqida xabar berilgan edi. Shuningdek, Rossiya COVID-19 ni davolashda foydalanish mumkin bo‘lgan preparat nomini e’lon qilgandi.
Izoh (0)