Koronavirus tarqalishining oldini olish maqsadida O‘zbekiston sudlarida fuqarolarning shaxsiy qabuli, sayyor sud majlislari to‘xtatilishi haqida xabar berilgan edi. Oliy sud matbuot xizmati karantin davrida qaysi toifadagi ishlarni ko‘rib chiqish davom ettirilishini ma’lum qildi.
Oliy sud rayosatining 2020-yil 20-martdagi “O‘zbekiston Respublikasi sudlarida COVID-19 koronavirus infeksiyasi tarqalishining oldini olish to‘g‘risida”gi qaroriga muvofiq, quyidagi ishlarni ko‘rish davom ettiriladi:
- qamoqqa olish ehtiyot chorasini qo‘llash;
- qamoqda saqlash muddatini uzaytirish, o‘zgartirish yoki bekor qilish;
- ma’muriy qamoqqa olish;
- shaxsni tibbiy muassasaga joylashtirish;
- shaxsni g‘ayriixtiyoriy tartibda psixiatriya statsionariga yotqizish (statsionarda yotish muddatini uzaytirish);
- shaxsni sil kasalligiga qarshi kurashish muassasasiga g‘ayriixtiyoriy tartibda yotqizish (muassasada yotish muddatini uzaytirish);
- fuqaroni muomala layoqatini cheklash yoki muomalaga layoqatsiz deb topish;
- va boshqa kechiktirib bo‘lmaydigan toifadagi ishlarni ko‘rib chiqish.
Bundan tashqari, ko‘rib chiqilish uchun tayinlangan ishlar qoldirilgani sababli ularni ko‘rilishga qayta tayinlangan vaqti bo‘yicha sud majlisi ishtirokchilariga alohida xabar qilinadi.
Avvalroq karantin sababli onlayn ish rejimiga o‘tgan adliya idoralarida karantin davrida fuqarolar notarial xizmatlardan qanday foydalanishi mumkinligi haqida ma’lumot berilgan edi. Shuningdek, koronavirus sababli O‘zbekistonda FHDYo organlarida nikohni qayd etish vaqtincha to‘xtatildi.
Izoh (0)