O‘zbekistonda koronavirus aniqlangani haqidagi xabarlardan keyin mamlakat aholisi oziq-ovqat va zaruriy mahsulotlarning zaxirasini to‘plashga kirishdi. “Gazeta.uz” nashri mamlakatdagi uchta supermarketlar tarmog‘ida qaysi mahsulotlarga talab oshganligini o‘rgandi. Talab oshgan asosiy mahsulotlar qatoridan grechka, bug‘doy uni, makaron mahsulotlari, guruch, o‘simlik yog‘i, hojatxona qog‘ozi o‘rin olgan.
Ma’lum bo‘lishicha, Toshkent shahrida va mamlakatning sakkizta viloyatida faoliyat olib boradigan “Korzinka.uz” supermarketlar tarmog‘ida 15—25-mart kunlari bir qator oziq-ovqat mahsulotlariga bo‘lgan talab 4—14-mart davriga nisbatan sezilarli darajada oshgan. Xususan, grechkaning savdosi 15—25-mart kunlari 187,2 foizga o‘sgan bo‘lsa, bug‘doy uniga bo‘lgan talab 164,6 foizga oshgan. Makaron mahsulotlari savdosi 131,3 foizga, guruch savdosi 117,5 foizga va kungaboqar yog‘ining savdosi 92,7 foizga o‘sgan. Hojatxona qog‘ozi talab eng yuqori bo‘lgan oltita mahsulot qatoridan o‘rin olgan, mazkur mahsulotga bo‘lgan talab 83,6 foizga ko‘paygan.
Toshkent shahrida va mamlakatning oltita viloyatida o‘z supermarketlariga ega bo‘lgan Makro tarmog‘ida ham oziq-ovqat mahsulotlariga bo‘lgan talabning oshgani kuzatilgan. Tarmoqda bug‘doy uniga bo‘lgan talab 184 foizga, grechkaga bo‘lgan talab 157 foizga oshgani kuzatilgan. Kartoshka savdosi 152 foizga, makaron mahsulotlari savdosi 143 foizga, kungaboqar yog‘ining savdosi 128 foizga o‘sgan. Hojatxona qog‘ozining savdosi 95 foizga oshgani qayd etilgan.
Faqat Toshkent shahrida faoliyat olib borayotgan Havas supermarketlar tarmog‘ida qog‘oz sochiqlar savdosi 324 foizga oshgan. Shuningdek, kashalar va dukkakli mahsulotlarga bo‘lgan talab 224 foizga, o‘simlik yog‘iga bo‘lgan talab 174 foizga o‘sgan. Qog‘oz salfetkalar va hojatxona qog‘ozlari savdosining mos ravishda 162 va 157 foizga oshgani qayd etilgan.
Avvalroq, Toshkent shahar hokimligi bozorlardagi navbatlarga munosabat bildirib, oziq-ovqat tanqisligi bo‘lmasligini ma’lum qildi. “Korzinka.uz” supermarketlariga navbat bilan kirish yo‘lga qo‘yilgani, xaridorlar masofa saqlab mahsulot olishi e’lon qilindi. Moliya vazirligi antiseptik vositalarga bo‘lgan talab oshgani sabab etil spirti sotuvi ustidan nazorat o‘rnatadi
Izoh (0)