Коронавирус тарқалишининг олдини олиш мақсадида Ўзбекистон судларида фуқароларнинг шахсий қабули, сайёр суд мажлислари тўхтатилиши ҳақида хабар берилган эди. Олий суд матбуот хизмати карантин даврида қайси тоифадаги ишларни кўриб чиқиш давом эттирилишини маълум қилди.
Олий суд раёсатининг 2020 йил 20 мартдаги «Ўзбекистон Республикаси судларида COVID-19 коронавирус инфекцияси тарқалишининг олдини олиш тўғрисида»ги қарорига мувофиқ, қуйидаги ишларни кўриш давом эттирилади:
- қамоққа олиш эҳтиёт чорасини қўллаш;
- қамоқда сақлаш муддатини узайтириш, ўзгартириш ёки бекор қилиш;
- маъмурий қамоққа олиш;
- шахсни тиббий муассасага жойлаштириш;
- шахсни ғайриихтиёрий тартибда психиатрия стационарига ётқизиш (стационарда ётиш муддатини узайтириш);
- шахсни сил касаллигига қарши курашиш муассасасига ғайриихтиёрий тартибда ётқизиш (муассасада ётиш муддатини узайтириш);
- фуқарони муомала лаёқатини чеклаш ёки муомалага лаёқатсиз деб топиш;
- ва бошқа кечиктириб бўлмайдиган тоифадаги ишларни кўриб чиқиш.
Бундан ташқари, кўриб чиқилиш учун тайинланган ишлар қолдирилгани сабабли уларни кўрилишга қайта тайинланган вақти бўйича суд мажлиси иштирокчиларига алоҳида хабар қилинади.
Аввалроқ карантин сабабли онлайн иш режимига ўтган адлия идораларида карантин даврида фуқаролар нотариал хизматлардан қандай фойдаланиши мумкинлиги ҳақида маълумот берилган эди. Шунингдек, коронавирус сабабли Ўзбекистонда ФҲДЁ органларида никоҳни қайд этиш вақтинча тўхтатилди.
Изоҳ (0)