Norvegiya neft bozoriga kuchli zarba berishga shaylanmoqda

Norvegiya neft narxiga kuchli zarba berishga tayyorgarlik ko‘rmoqda: mamlakat Shimoliy dengizdagi Yoxan Sverdrup ulkan neft konidagi xomashyoni neft bozoriga chiqarmoqda. Bu haqda Bloomberg xabar qilgan.

Equinor kompaniyasi neft ishlab chiqarishni 2019-yil noyabr oyida boshlagan va dekabrga kelib ko‘rsatkichni sutkasiga 350 ming barrel neft ishlab chiqarishga oshirdi. 2020-yil yozida neft zavodining kuniga 440 ming barrel “qora oltin” ishlab chiqarishi, 2022-yildan keyin esa 660 ming barrelga yetkazilishi kutilgandi. Biroq 30-mart, dushanba kuni, Equinor may boshidayoq sutkasiga 470 ming barrel neft ishlab chiqarishni boshlashi, ya’ni targetdan 30 ming barrelga ko‘proq xomashyo yetishtirishi ma’lum qilindi.

Norvegiyaning neft ishlab chiqarish hajmini oshirishi bozordagi vaziyatni yanada og‘irlashtiradi. Odatda butun dunyoda neft xomashyosining 100 million barreli iste’molga yo‘naltiriladi. Biroq neft inqirozi davrida ushbu raqam 25 foizga qisqarishi mumkin. Shu tariqa bozorda sutkasiga 25 million barrel ortiqcha neft paydo bo‘ladi.

Norvegiya neft zavodi egalari ushbu vaziyatga qaramay “qora oltin” ishlab chiqarish hajmini oshirishda davom etmoqchi. Yangidan boshlangan jahon moliyaviy inqirozi va bozorlardagi beqaror vaziyatda Yoxan Sverdrup zavodi Equinor va boshqa kompaniyalar uchun xomashyo arzonga tushishi hisobiga yaxshi daromad manbaiga aylanishi mumkin. Garchi Brent markasidagi neft narxi 2002-yil noyabr oyidan beri minimum bo‘lgan barrel uchun 23 dollarga tushib ketgan bo‘lsa ham, Yoxan Sverdrup xomashyo sotuvida hatto barrel uchun 20 dollardan pastroq narxlansa ham daromad keltirishga qodir.