Rossiya Urals neftining dengiz partiyalari narxi Shimoli-g‘arbiy Yevropa uchun CIF yetkazib berish shartlarida (Rotterdam porti orqali) 27-mart, juma kuni barrel uchun 16,2 dollargacha pastladi. Bu haqda Argus Media narx-navo agentligi xabar qilgan.
Agentlik ma’lumotlariga ko‘ra, bu Rossiya neftining 1999-yildan beri kuzatilgan eng minimal darajasi hisoblanadi. XXI asrda Rossiya nefti bu qadar arzon narxlanmagandi.
O‘tgan haftada Rossiya nefti Shimoli-g‘arbiy Yevropada barrel uchun 5,51 dollarga arzonlashgan.
Shimoliy dengizdagi (Argus North Sea Dated, shimoliy dengiz yengil nefti narxini ifodalovchi etalon) Urals markasiga nisbatan chegirma barrel uchun 4,75 dollarga arzonlashgan (CIF Rotterdam) — bu 2008-yildan beri kuzatilgan maksimal uzoqlashuv.
Urals partiyalarining O‘rta Yer dengizi orqali yetkazib berilishi bir hafta ichida barrel uchun 4,26 dollarga arzonlashib, barrel uchun 18,45 dollarga teng bo‘ldi (CIF, Augusta porti, Italiya). Ushbu asosda bu 2002-yildan beri kuzatilgan eng minimal narx, deya qayd etgan Argus.
CIF yetkazib berish shartlarida neftni kelishilgan portgacha eltib berish, yuk sug‘urtasi bo‘yicha majburiyatlarni sotuvchi tomon o‘z zimmasiga oladi.
Refinitiv ma’lumotlariga ko‘ra, Urals markasidagi neftning eng arzon narxlanishi 1999-yil fevral oyida kuzatilgan — barrel uchun 8,87 dollar.
Neftni yetkazib berish hisobga olinganda narxlar 14,5 dollargacha tushib ketgan.FOB yetkazib berish shartlariga ko‘ra ya’ni bunda sotuvchi tomon yukni yetkazib berish, portdan tushirish, yuk qiymati va import rasmiylashtiruvi harajatlarini o‘z zimmasiga olishi bilan hisoblaganda Urals narxi yana ham pastlagan:
FOB bazisidagi barcha kotirovkalar 2005-yildan beri minimumga tushib qolgan
Urals’ning dengiz partiyalari narxi bir hafta ichida Rossiya portlaridan aprelda martdagiga nisbatan 13 foizga ko‘proq neft jo‘natilishi sabab arzonlashgan. Yetkazib berish ko‘rsatkichi Rossiya neftni qayta ishlash zavodlaridagi ta’mirlash ishlari sabab, shuningdek, OPEK+ kelishuvi muddati tugashi sabab o‘sishi mumkin.
“Bozor ishtirokchilari neftni qayta ishlash qisqargani sabab past narxlar uzoq davr mobaynida o‘zgarmay turishini taxmin qilmoqda. Ko‘plab neft mahsulotlariga talab koronavirus pandemiyasi tufayli kuzatilgan jahon iqtisodiy faolligining pasayishi oqibatida kamaygan. OPEK+ kelishuvi muddatining tugashi vaziyatni yanada og‘irlashtirdi”, — deyiladi Argus ma’lumotida.
Bloomberg nashri neft bozorida talabning keskin kamaygani haqida yozgandi. Quruqlikdagi neft saqlash joylari to‘lib-toshgan, oqibatda treyderlar neftni dengizdagi supertankerlarda saqlashga majbur bo‘layotgani; mahsulotga talab yo‘qligi sabab neftni qayta ishlash zavodlari ishini vaqtincha to‘xtatgani haqida yozgandi. Ko‘plab hududlarda neft barrel uchun dollardan arzonroqqa, ayrim izolyatsiya qilingan yerlarda esa undan-da yomonroq narxlar kuzatilmoqda, sotuvchilar neftni sotish uchun qo‘shimcha pul to‘lashiga to‘g‘ri kelmoqda. 2020-yil aprel oyida neftga butun dunyoda bo‘lgan talab 20 foizga tushib, 2019-yildagi ko‘rsatkichdan ham pastroq darajada bo‘lishi prognoz qilinmoqda.
Rossiya banki Urals narxini barrel uchun 25 dollarga baholagan, Rossiya Markaziy banki rublni qo‘llab-quvvatlash uchun valyutani o‘z zaxiralari hisobidan qo‘shimcha intervensiya qilishi mumkin.
Izoh (0)