Қозоғистонда коронавирус туфайли нонни фақат қадоқларда сотиш тавсия этилди

Қозоғистон Савдо ва интеграция вазирлиги мамлакатда COVID-19 коронавирус пандемияси туфайли фавқулодда ҳолат жорий этилганидан кейин бир қатор тавсиялар билан чиқди, деб хабар бермоқда Tengrinews.

Хусусан, санитария йирик савдо объектлари фаолиятини хавфсизлиги чораларини кучайтирган ҳолда 10 соатдан 18 соатгача чеклашни тавсия қилди. Савдо объектлари ҳудудида кинотеатрлар, болалар марказлари ва бошқа турли кўнгилочар жойлар ёпиқ бўлиши керак. Озиқ-овқат дўконлари, супермаркетлар ва бозорлар санитария ва дезинфекция тадбирларини кучайтирган ҳолда одатдагидек тартибда ишлаши керак.

Шунингдек, нон ва қандолат маҳсулотларини сотиш фақат қадоқланган шаклда амалга оширилиши керак.

Эслатиб ўтамиз, Қозоғистонда коронавирус тарқалиши муносабати билан 16 мартдан 15 апрелга қадар фавқулодда ҳолат режими жорий қилинди. Бу даврда қозоғистонликлар мамлакатни тарк эта олмайди (хорижга даволаниш учун кетаётганлардан ташқари).

Ҳозирда Қозоғистонда коронавирус юқтириб олганлар сони олти нафарни ташкил этади. 1090 киши касалхонага ётқизилган, 452 киши уй карантинида.

Мамлакатда оммавий тадбирлар бекор қилинди, мактаб ўқувчилари таътилга эртароқ чиқди, давлат органларига хорижга хизмат сафарига чиқиш тақиқланди. Фуқароларга қўл бериб кўришмаслик тавсия қилинди.

Чимкентликлар ҳалокатли коронавируснинг олдини олиш учун халқ табобати усулларига мурожаат қилиб, исириқ сотиб олишни бошлади. Айрим бозорларда исириқнинг ҳаммаси сотилиб кетган.

Аввалроқ Ўзбекистонда коронавирусга чалиниш билан боғлиқ биринчи ҳолат қайд этилгани, 11 март, чоршанба куни, Uzbekistan Airways’нинг Париж—Тошкент рейси билан учиб келган аёл Республика Вирусология институтига мурожаат қилгани ва таҳлил натижалари унинг коронавирусга чалингани хабар берилганди.

Шундан сўнг унинг 9 нафар оила аъзоси, шунингдек, рейснинг Ўзбекистонда қолган йўловчилари ва улар билан мулоқотда бўлган одамлар — жами 150 киши изоляцияга олингани олинган. 16 мартдан бошлаб хорижий давлатлар билан барча авиарейслар бекор қилиниб, автотранспорт воситасида Ўзбекистонга кириш-чиқиш тўхтатилди.