“Aeroflot” O‘zbekistonga parvozlarni vaqtincha to‘xtatdi

Rossiyaning “Aeroflot” aviakompaniyasi Markaziy Osiyo va Yevropa davlatlariga aviareyslarning vaqtincha to‘xtatilganini e’lon qildi. Bu haqda kompaniya rasmiy saytida xabar berilgan.

O‘zgarishlarga koronavirus pandemiyasi sabab bo‘lgan. Cheklovlar, jumladan, Moskva—Praga—Moskva (20-mart—30-aprel kunlari), Moskva—Frankfurt—Moskva (19-mart—30-aprel) reyslariga ham taalluqli.

16-martdan boshlab O‘zbekistonga parvozlarni amalga oshirish ham cheklab qo‘yilgan — Toshkent, Buxoro va Samarqand shaharlariga parvozlar 16-martdan 30-aprelga qadar amalga oshirilmaydi.

Shuningdek, 16-martdan 30-aprelgacha Moskva—Saloniki—Moskva, 21-martdan 30-aprelgacha Moskva—Barselona reyslari to‘xtatiladi. Bundan tashqari aviakompaniya Kopengagen, Syurix, Oslo, Vilnyus, Kishinyov, Varshava, Vena va Tallin shaharlariga parvozlarni ham 17-martdan 30-aprelgacha to‘xtatadi.

Avvalroq “Aeroflot” Janubiy Koreya, Vyetnam va Italiyaga parvozlarni bekor qilgandi. Qayd etish joiz, Uzbekistan Airways aviakompaniyasi ham 16-martdan 5-aprelgacha (muddat uzayishi mumkin) xorij davlatlariga aviaparvozlarni to‘xtatgan.Avvalroq O‘zbekistonda koronavirusga chalinish bilan bog‘liq birinchi holat qayd etilgani, 11-mart, chorshanba kuni, Uzbekistan Airways’ning Parij—Toshkent reysi bilan uchib kelgan ayol Respublika Virusologiya institutiga murojaat qilgani va tahlil natijalari uning koronavirusga chalingani ma’lum bo‘lgan.

Shundan so‘ng uning 9 nafar oila a’zosi, shuningdek, reysning O‘zbekistonda qolgan yo‘lovchilari va ular bilan muloqotda bo‘lgan odamlar — jami 150 kishi izolyatsiyaga olingani olingan. 16-martdan boshlab xorijiy davlatlar bilan barcha aviareyslar bekor qilinib, avtotransport vositasida O‘zbekistonga kirish-chiqish to‘xtatiladi.

Koronavirusning O‘zbekistondagi mart oyida bo‘ladigan to‘ylarga ta’sir ko‘rsatmasligi, hukumat O‘zbekistondagi diniy idoralarga diniy marosimlar o‘tkazishni vaqtincha cheklash bo‘yicha iltimos bilan murojaat qilgani aytildi. Shuningdek, barcha sport (masalan, Superliga), madaniy (jumladan, konsert) va boshqa tadbirlar, shuningdek, Navro‘z tantanalari va u bilan bog‘liq boshqa ommaviy marosimlar ham bekor qilingan.

Mamlakatda bolalar bog‘chalari, o‘rta maktablar va oliy ta’lim muassasalari (davlatnikimi, xususiymi, farqi yo‘q) ham karantinga yopiladi. Toshkent shahar hokimligi koronavirus profilaktikasi doirasida Toshkent shahridagi bozorlar yopilmasligi, Tashqi ishlar vazirligi esa O‘zbekiston fuqarolariga vatanga qaytish uchun davlat chegarasidan o‘tish taqiqlanmaganini ma’lum qildi.

Davlat soliq qo‘mitasi raisi oziq-ovqat mahsulotlari narxi nazoratga olinishini bildirgan.

Keyinchalik, Fransiyadan uchib kelgan ayolning o‘g‘li va qizida ham koronavirus infeksiyasi aniqlandi. Sog‘liqni saqlash vazirligi 15-mart, yakshanba kuni soat 05:15 da Istanbul—Toshkent yo‘nalishidagi 274- reys bilan Toshkentga kelgan yana bir O‘zbekiston fuqarosida koronavirus infeksiyasi aniqlangani haqida ma’lum qildi. Shu tariqa O‘zbekistonda koronavirus bilan kasallanganlar soni 4 nafarga yetgan.

15-mart holatiga ko‘ra butun dunyoda COVID-19 koronavirus infeksiyasini yuqtirib olganlar soni 156 ming nafardan oshgani xabar qilingan. COVID-19 keltirib chiqargan pnevmoniya kasalligidan o‘lganlar soni 5819 nafarni, tuzalib ketganlar esa 73,9 ming nafarni tashkil etgan. Kasallanish holatlari dunyoning 142 ta mamlakatida qayd etilgan.