Qozog‘istonliklarning o‘zlari gipermarketlarda ajiotaj keltirib chiqarib, oziq-ovqat mahsulotlari narxining qimmatlashishiga sabab bo‘lmoqda. Bu haqda Olmaota Tadbirkorlik va investitsiyalar boshqarmasi boshlig‘i Yerkebulan Orazalinga tayanib, Tengrinews xabar berdi.
“Bugungi kunda gipermarket va yirik do‘konlarda ajiotaj kuzatilmoqda. Odamlar uzun navbatlarda turib, xaridlarni amalga oshirmoqda, bunday qilish kerak emas. Ular o‘z harakatlari bilan narxlarning oshishiga sabab bo‘lmoqda. Bu oddiy bozor sharoiti — talabning ko‘pligi qo‘shimcha taklifni keltirib chiqaradi va yetkazib beruvchilarda ko‘proq pul ishlab olish imkoniyatini beradi”, — deydi Yerkebulan Orazalin.
Uning qo‘shimcha qilishicha, hukumat ushbu jarayonni nazorat qilmoqda va narxlarning oshishiga yo‘l qo‘ymaslikka harakat qilyapti. “Biroq bozor — bozor va buning oqibatlari yuzaga kelmasligiga hech kim kafolat bermaydi. Masalan, shakar narxida ajiotaj kuzatilmoqda. Shakar bor, yetkazib beruvchi bor, biroq uning narxi sezilarli darajada oshdi. Odamlar qancha mahsulot sotib olmasin, ularni shunchaki saqlaydi, bu vaqt davomida esa bir qator mahsulotlarning yaroqlilik muddati o‘tishi mumkin”, — deydi Orazalin. Uning so‘zlariga ko‘ra, Olmaota rahbariyati peshtaxtalardan tovarlar hech qayerga yo‘qolmasligini ishonch bilan ma’lum qilgan.
Hukumat koronavirusning oldini olish bo‘yicha choralar ko‘rilishini ma’lum qilganidan so‘ng, tarmoqlarda supermarketlarda sodir bo‘layotgan foto va videolar paydo bo‘la boshladi. Shuningdek, Qozog‘istonning bosh sanitar shifokori Jandarbek Bekshinning mamlakatda koronavirus yuqtirib olish bilan bog‘liq dastlabki holat 11—16-mart kunlari oralig‘ida qayd etilishi mumkinligi to‘g‘risidagi bayonoti ham ajiotajga sabab bo‘ldi.
Izoh (0)