Қозоғистонликларнинг ўзлари гипермаркетларда ажиотаж келтириб чиқариб, озиқ-овқат маҳсулотлари нархининг қимматлашишига сабаб бўлмоқда. Бу ҳақда Олмаота Тадбиркорлик ва инвестициялар бошқармаси бошлиғи Еркебулан Оразалинга таяниб, Tengrinews хабар берди.
«Бугунги кунда гипермаркет ва йирик дўконларда ажиотаж кузатилмоқда. Одамлар узун навбатларда туриб, харидларни амалга оширмоқда, бундай қилиш керак эмас. Улар ўз ҳаракатлари билан нархларнинг ошишига сабаб бўлмоқда. Бу оддий бозор шароити — талабнинг кўплиги қўшимча таклифни келтириб чиқаради ва етказиб берувчиларда кўпроқ пул ишлаб олиш имкониятини беради», — дейди Еркебулан Оразалин.
Унинг қўшимча қилишича, ҳукумат ушбу жараённи назорат қилмоқда ва нархларнинг ошишига йўл қўймасликка ҳаракат қиляпти. «Бироқ бозор — бозор ва бунинг оқибатлари юзага келмаслигига ҳеч ким кафолат бермайди. Масалан, шакар нархида ажиотаж кузатилмоқда. Шакар бор, етказиб берувчи бор, бироқ унинг нархи сезиларли даражада ошди. Одамлар қанча маҳсулот сотиб олмасин, уларни шунчаки сақлайди, бу вақт давомида эса бир қатор маҳсулотларнинг яроқлилик муддати ўтиши мумкин», — дейди Оразалин. Унинг сўзларига кўра, Олмаота раҳбарияти пештахталардан товарлар ҳеч қаерга йўқолмаслигини ишонч билан маълум қилган.
Ҳукумат коронавируснинг олдини олиш бўйича чоралар кўрилишини маълум қилганидан сўнг, тармоқларда супермаркетларда содир бўлаётган фото ва видеолар пайдо бўла бошлади. Шунингдек, Қозоғистоннинг бош санитар шифокори Жандарбек Бекшиннинг мамлакатда коронавирус юқтириб олиш билан боғлиқ дастлабки ҳолат 11—16 март кунлари оралиғида қайд этилиши мумкинлиги тўғрисидаги баёноти ҳам ажиотажга сабаб бўлди.
Изоҳ (0)