Normativ-huquqiy hujjatlar loyihalari muhokamasi portaliga O‘zbekiston Respublikasi “Xususiy bandlik agentliklari to‘g‘risida”gi qonuniga o‘zgartirish va qo‘shimchalar kiritish haqida”gi qonun loyihasi jamoatchilik muhokamasiga qo‘yildi.
Loyihaga ko‘ra, amaldagi qonunning 13-moddasi (Xususiy bandlik agentliklarining O‘zbekiston Respublikasidan tashqaridagi ishni qidirayotgan shaxslarni ishga joylashtirish bo‘yicha xizmatlari) ikkinchi qismi chet elda ishni qidirayotgan shaxslarni ishga joylashtirish bo‘yicha ko‘rsatilgan xizmatlar uchun to‘lovlarni ish beruvchi yoki buyurtmachi hisobidan amalga oshirish tartibini nazarda tutuvchi yangi xatboshi bilan to‘ldirilmoqda.
Shuningdek, kiritilishi kutilayotgan normaga ko‘ra, O‘zbekistondan tashqaridagi ishni qidirayotgan shaxslarni ishga joylashtirish bo‘yicha ko‘rsatilgan xizmatlar uchun to‘lovlar undirish taqiqlanadi.
Bundan tashqari, xususiy bandlik agentliklarining Bandlik va mehnat munosabatlari vazirligi huzuridagi Xorijda mehnat faoliyatini amalga oshiruvchi fuqarolarni qo‘llab-quvvatlash hamda ularning huquq va manfaatlarini himoya qilish jamg‘armasida shakllantiradigan zaxira mablag‘lari miqdori ellik ming AQSh dollaridan bazaviy hisoblash miqdorining sakkiz ming besh yuz baravariga almashtirilmoqda.
Qonunning 14-moddasiga kiritilayotgan qo‘shimchaga ko‘ra, xususiy bandlik agentliklari ishga joylashtirish sohasida axborot va maslahat xizmatlari ko‘rsatganlik uchun mijozlardan bazaviy hisoblash miqdorining ikki baravaridan oshmagan miqdorda haq olish mumkin bo‘ladi.
Qonunning 15-moddasi yangi qismi bilan to‘ldiriladi va Xususiy bandlik agentligi tomonidan xizmatlar ko‘rsatish to‘g‘risidagi shartnoma Bandlik va mehnat munosabatlari vazirligining “labor-migration” dasturiy majmuasida real vaqt rejimida ro‘yxatdan o‘tkaziladigan bo‘ladi. Ro‘yxatdan o‘tmagan shartnoma haqiqiy emas deb topilishiga sabab bo‘ladi.
Bandlik va mehnat munosabatlari vazirligiga yana bir vakolat taqdim etilmoqda. Unga ko‘ra, vazirlik xususiy bandlik agentliklari faoliyatini tadbirkorlik subyektlari faoliyatini tekshirishlarni muvofiqlashtirish bo‘yicha vakolatli organni keyinchalik xabardor qilgan holda (moliya-xo‘jalik faoliyatiga aralashmasdan) tekshirish vakolatiga ega bo‘ladi.
Tekshirishlar jarayonida vazirlikning vakolatli vakillari xususiy bandlik agentliklarining hududlari va binolariga moneliksiz kirish, hujjatlar bilan tanishib chiqish, ulardan ko‘chirma nusxalar hamda mas’ul xodimlardan faoliyatga doir masalalar bo‘yicha og‘zaki va yozma tushuntirishlar olish huquqiga ega bo‘ladi.
Bandlik va mehnat munosabatlari vazirligi tomonidan joylangan ushbu loyiha muhokamasi shu yilning 24-martiga qadar davom etadi.
Xususiy bandlik agentliklari bilan bog‘liq vaziyat haqida
O‘zbekistonda xususiy bandlik agentliklari to‘g‘risidagi qonun 2018-yil oktabr oyida kuchga kirgan edi. 2019-yil kuzidan beri Human, Korean and migrations va boshqa xususiy bandlik agentliklarining rahbarlariga nisbatan firibgarlik moddasi bo‘yicha jinoyat ishlari qo‘zg‘atilgani haqida xabarlar paydo bo‘ldi (ma’lumotlarga ko‘ra, sakkizta agentlikka qarshi jinoyat ishlari qo‘zg‘atilgan).
Mavzuga doir: O‘zbekistondagi 30 ta xususiy bandlik agentligi birorta ham fuqaroni xorijga jo‘natmagani ma’lum bo‘ldi
O‘z navbatida, Bandlik va mehnat munosabatlari vazirligi qonunga o‘zbekistonliklarni xorijda ishga joylashtirish bo‘yicha vijdonsiz xizmat ko‘rsatilishidan himoya qila oladigan tuzatishlarni kiritish niyatini bildirgan edi.
2020-yilning 17-fevral kuni O‘zbekistonning turli hududlaridan kelgan 100 ga yaqin odam Toshkentdagi Mustaqillik maydonida yig‘ilib, Human agentligi tomonidan yetkazilgan zararning qoplab berilishini talab qilgan edi. Ular bilan dastlab bosh vazir o‘rinbosari Aziz Abduhakimov hamda bandlik va mehnat munosabatlari vaziri Nozim Husanov uchrashdi.
Keyinroq norozi fuqarolar bilan O‘zbekiston bosh vaziri Abdulla Aripov ham uchrashdi. Uchrashuv yakunlariga ko‘ra, hukumat rahbari Human bandlik agentligi tomonidan fuqarolarga yetkazilgan 21 milliard so‘m (taxminan 2,2 million dollar) miqdoridagi zararni vazirlik huzuridagi budjetdan tashqari fond hisobidan vaqtincha qoplab turish haqida topshiriq berdi.
Izoh (0)