Rossiyada koronavirus bilan kasallanish bo‘yicha uchta yangi holat qayd etildi
Rossiyada oxirgi kunlarda koronavirus yuqtirib olish bo‘yicha uchta yangi holat qayd etildi. Bu haqda “Interfaks” axborot agentligi virusga qarshi kurash tezkor shtabi ma’lumotlariga asoslanib xabar tarqatgan.
Foto: EPA
Kasallikni yuqtirib olganlar Moskva, Kaliningrad va Belgorod viloyatlarida yashovchi odamlar ekani aytilmoqda. Uchalasi ham Italiyaga sayohat qilib qaytgan. Ayni vaqtda ular infeksion xonalarda karantinda saqlanmoqda.
Shu tariqa Rossiyada koronavirusga chalingan odamlar soni 17 nafarga yetgan.
Qolgan 14 ta holatning ikkitasi yanvar oxirida ikki nafar xitoylikda (ikkovi ham 12-fevralda tuzalgan va kasalxonadan chiqqan), 11 tasi esa Rossiya fuqarolarida kuzatilgan. Aksariyati Italiyadan qaytgan odamlar: bir nafar Moskva shahrida yashovchi fuqaro tuzalgan va 6-mart, juma kuni, kasalxonadan chiqqan, yana bir holat Peterburgdagi tibbiyot universitetida o‘qiydigan italiyalik talabada kuzatilgan. Yana uch nafar bemor Rossiyada yuritilayotgan koronavirus bo‘yicha statistikaga kirmaydi: ular Yaponiya sohillari yaqinidagi Diamond Princess sayohat layneridan Qozon shahriga evakuatsiya qilingan. Ular 8-mart, yakshanba kuni, sog‘ayib, uyiga qaytgan.
Izoh (0)