Saudiya Arabistoni Rossiya bilan Neft eksport qiluvchi davlatlar tashkiloti bilan hamkorlik doirasida imzolanishi ko‘zda tutilgan kelishuv bekor bo‘lgach barcha turdagi neftning narxini arzonlashtirdi. Bu haqda Reuters xabar qilgan.
Suadiya Arabistonining Saudi Aramco davlat neft korxonasi Osiyo uchun aprel oyida beriladigan neft narxini barrel uchun 4-6 AQSh dollariga arzonlashtirdi, AQSh uchun barrelga 7 dollar, shimoli-g‘arbiy Yevropa uchun barrelga 8 dollar deb belgilagan.
Bloomberg nashri manbalariga ko‘ra, Saudiya Arabistoni aprel oyida neft ishlab chiqarish hajmini ham oshiradi. Hozir sutkasiga 9,7 million barrel bo‘lgan ko‘rsatkich 10 million barreldan oshirilib, zarurat bo‘lganida, rekord daraja — sutkasiga 12 million barrelga yetkaziladi.
Ekspertlarning fikricha, Saudiya Arabistonining ushbu taktikasi Rossiya va boshqa neft eksport qiluvchi davlatlarga bosim o‘tkazish va ularni Neft eksport qiluvchi davlatlar tashkiloti bilan muzokaralarga qaytarishga qaratilgan.
Rossiya va Neft eksport qiluvchi davlatlar tashkiloti 6-mart, juma kuni, neft ishlab chiqarishni qisqartirish bo‘yicha amaldagi kelishuvni uzaytirmagan. Oqibatda aprel oyidan boshlab barcha cheklovlar bekor qilinadi.
Kelishuv amalga oshmagach neft narxi bir kun ichida qariyb 9 foizga arzonlashgan. Bu oxirgi 11 yil ichida bir kunda kuzatilgan narxning eng yuqori pasayishi bo‘ldi. Saudi Aramco’ning kapitalizatsiyasi IPO narxlaridan ham past qiymatda baholangan.
Izoh (0)