Россияда коронавирус билан касалланиш бўйича учта янги ҳолат қайд этилди
Россияда охирги кунларда коронавирус юқтириб олиш бўйича учта янги ҳолат қайд этилди. Бу ҳақда «Интерфакс» ахборот агентлиги вирусга қарши кураш тезкор штаби маълумотларига асосланиб хабар тарқатган.
Фото: EPA
Касалликни юқтириб олганлар Москва, Калининград ва Белгород вилоятларида яшовчи одамлар экани айтилмоқда. Учаласи ҳам Италияга саёҳат қилиб қайтган. Айни вақтда улар инфекцион хоналарда карантинда сақланмоқда.
Шу тариқа Россияда коронавирусга чалинган одамлар сони 17 нафарга етган.
Қолган 14 та ҳолатнинг иккитаси январь охирида икки нафар хитойликда (иккови ҳам 12 февралда тузалган ва касалхонадан чиққан), 11 таси эса Россия фуқароларида кузатилган. Аксарияти Италиядан қайтган одамлар: бир нафар Москва шаҳрида яшовчи фуқаро тузалган ва 6 март, жума куни, касалхонадан чиққан, яна бир ҳолат Петербургдаги тиббиёт университетида ўқийдиган италиялик талабада кузатилган. Яна уч нафар бемор Россияда юритилаётган коронавирус бўйича статистикага кирмайди: улар Япония соҳиллари яқинидаги Diamond Princess саёҳат лайнеридан Қозон шаҳрига эвакуация қилинган. Улар 8 март, якшанба куни, соғайиб, уйига қайтган.
Изоҳ (0)