Vazirlar Mahkamasining 4-martdagi qaroriga asosan, Rossiyaning Moskva energetika instituti (MEI) milliy tadqiqot universiteti Toshkent filialining tuzilmasi tasdiqlandi. Bu haqda Adliya vazirligi xabar berdi.
Qarorga muvofiq, talabalarni to‘lov-kontrakt asosida o‘qitish qiymati MEI milliy tadqiqot universiteti, O‘zbekiston Oliy va o‘rta maxsus ta’lim vazirligi hamda O‘zbekiston Energetika vazirligi bilan kelishilgan holda filial tomonidan tasdiqlanadi.
Moskva energetika instituti (MEI) milliy tadqiqot universiteti Toshkent filialini tashkil etish bo‘yicha kelishuv 2018-yilning oktabr oyida imzolangan.
Filial O‘zbekiston Prezidentning 2019-yil 4-iyundagi qarori bilan tashkil etilgan bo‘lib, uning asosiy vazifalaridan biri O‘zbekiston energetika tarmog‘i uchun malakali muhandis-texnik kadrlar tayyorlash hisoblanadi. 2019/2020-o‘quv yillarida ta’lim muassasasiga “Issiqlik energetikasi va issiqlik texnikasi” hamda “Elektr energetikasi va elektr texnikasi” yo‘nalishlari bo‘yicha bakalavriat ochilgan.
Hukumatning 2019-yil 15-sentabrdagi qarori bilan Hojiakbar Daliyev Rossiya universiteti filialining ijrochi direktori lavozimini egallagan.
Izoh (0)