Shvetsiyaning EF Education First kompaniyasi O‘zbekistonda ingliz tilini o‘qitishni takomillashtirishga 60 million dollar yo‘naltirishni rejalashtirmoqda. Bu haqda O‘zbekiston Xalq ta’limi vazirligi xabar berdi.
Ma’lum qilinishicha, 5-mart, payshanba kuni, O‘zbekiston xalq ta’limi vaziri Sherzod Shermatov va EF Education First kompaniyasi direktori Karl-Yoxann Vestring anglashuv memorandumini imzolagan.
Qayd etilishicha, EF Education First kompaniyasi ingliz tilini o‘qitishga qaratilgan turli o‘quv dastur, metodika va pedagogik yondashuvlarni taklif etuvchi dunyodagi yirik tashkilotlardan biri hisoblanadi.
Mazkur memorandum doirasida tomonlar istiqbolli hamkorlikni rivojlantirishni rejalashtirmoqda.
Jumladan, tomonlar O‘zbekistonda ingliz tilini o‘rganishni xohlovchi o‘quvchi hamda o‘qituvchilar bilimini baholab, malaka va ko‘nikmalarini oshirish bo‘yicha treninglar tashkil etishda hamkorlik qiladi.
Shu bilan birga, tomonlar o‘quvchilarning ingliz tili bo‘yicha bilimini baholash va ularga turli o‘quv dasturlarini taqdim etishni ham rejalashtirgan.
Memorandum doirasida tomonlar O‘zbekistondagi o‘qituvchilarning kasbiy rivojlanishi uchun turli qo‘shma dasturlar ishlab chiqishni ko‘zlamoqdaю
Imzolangan hujjatda EF Education First kompaniyasi O‘zbekiston maktablarida ingliz tilini o‘qitishni takomillashtirish uchun 60 million dollar investitsiya kiritishga tayyorligini bildirgan.
Vazirlikning ta’kidlashicha, respublikadagi maktablarda qariyb 5,38 million o‘quvchi ingliz tilini xorijiy til sifatida o‘rganadi.
Izoh (0)